Ադանայի քաղաքապետի նոր թիրախը Հայկո Բաղդատն է

Հասարակական07:28, 03 Օգոստոս 2015

Ադանայի քաղաքապետի նոր թիրախը Հայկո Բաղդատն է

Ադանայի քաղաքպետ Հուսեյին Սյոզլուի վերջին թիրախը թուրքական «Taraf» թերթի հայազգի սյունակագիր Հայկո Բաղդատն է: Սյոզլուն, որը ներկայացնում է «Գորշ գայլեր» ահաբեկչական կազմակերպության քաղաքական թևը՝ «Ազգայնական շարժում կուսակցությունը» (MHP-ԱՇԿ), «Twitter» միկրոբլոգում քննադատել է Բաղդատին, սակայն վերջինիս պատասխանից անմիջապես հետո ջնջել է իր գրառումը:

«Թող ամաչեն բոլոր նրանք, ովքեր դեղատոմսը Հայկո Բաղդատից են ուզում: Ի հակառակ նրա՝ մենք բոլորս զինծառայության կամավորներ ենք: Մեր զինվորի կողքին ենք: «Քուրդիստանի բանվորական կուսակցությունը» և «Քուրդիստանի ժողովրդավարական միություն կուսակցությունը» (PYD- քրդական կուսակցություն Սիրիայում) իմ թշնամիներն են այնպես, ինչպես «Իսլամական պետություն» ահաբեկչական կազմակերպությունը»,- գրել է Սյոզլուն:

Սյոզլուի գրառմանը ի պատասխան՝ Բաղդատը հետևյալ գրառումն են արել. «Ինձնից դեղատոմս մի պահանջեք, Չի՛ լինելու»:

Թուրքական «Adanamedya» լրատվական կայքը տեղեկացնում է, որ հայ սյունակագրի պատասխանից հետո Սյոզլուն ջնջել է իր գրառումը:

Հիշեցնենք, որ Ադանայի քաղաքապետը ավելի վաղ հայերին թիրախավորող ևս մեկ գրառում էր արել իր միկրոբլոգում, այս անգամ արդեն անդրադառնալով Թուրքիայի ազգային մեծ ժողով (ԹԱՄԺ- TBMM) ընտրված 3 հայ պատգամավորներին:

Սյոզլուն մասնավորապես գրել է. «Մանուկյանի՝ Ադանայում գտնվող զարմիկը երջանիկ է. երեք մորաքրոջ երեխաներն էլ անցել են խորհրդարան: Ինչքան էլ հպարտանա՝ քիչ է»:

Տեղեկացնենք, որ Մաթիլդ Մանուկյանը Թուրքիայում հայտնի էր որպես հասարակաց տների տիրուհի:
Ըստ մամուլում տարածված տվյալների` Մանուկյանն ունեցել է 50 գրասենյակ, 50 խանութ, 4 ամառանոց, 220 տաքսի, 37 հասարակաց տուն , 40 շենք, 2 գործարան, 1 զբոսանավ, մեկ Ռոյլս ռոյս, 4 BMW, 4 Mercedes մակնիշի մեքենաներ և հյուրանոցներ, ինչպես նաև տրիլիոնավոր լիրա արժողությամբ զարդեր:

Աղբյուր` Ermenihaber.am