Հետախուզվող թուրք դատախազներն իրենց հետ գաղտնի պետական փաստաթղթեր են տարել

Իրավական13:27, 18 Օգոստոս 2015

Հետախուզվող թուրք դատախազներն իրենց հետ գաղտնի պետական փաստաթղթեր են տարել

Թուրք դատախազներ Զեքերյա Օզի և Ջելալ Քարանի փախուստն արտասահման շարունակում է մնալ թուրքական մամուլի ակտիվ քննարկման օրակարգում: Թուրքական «sonhaber.com.tr» կայքը, վկայակոչելով երկրի հետախուզական ծառայությունների տվյալները, նշում է, որ Գերմանիա փախած երկու թուրք դատախազները, որոնց վերաբերյալ Թուրքական դատարանի կողմից ձերբակալման վճիռ էր կայացվել, իրենց հետ տարել են պետական գաղտնի փաստաթղթեր:

Լրատվակայքն ավելացնում է նաև, որ տեսակետ կա, թե հատկապես կառավարության դեմ օգտագործվելիք փաստաթղեթրը դատախազ Զեքերյա Օզը կարող է տրամադրել Գերմանիայի հատուկ ծառայություններին` վերջիններիս իրեն Թուրքիային չհանձնելու դիմաց: Աղբյուրը նշում է նաև, որ գերմանական կառավարությունն աջակցում է «զուգահեռ կառույցին», (Գյուլենական շարժում կամ Գյուլենական համայնք-EH) որի անդամներն են հանդիսանում դատախազները:

Նշենք, որ նախօրեին նախագահ Ռեջեփ Էրդողանը Գերմանիայից պահանջել էր Թուրքիային հանձնել դատախազներին` չնայած այն հանգամանքին, որ Ինտերպոլը դեռևս վերջիններիս հետախուզման համար «կարմիր ծանուցագիր» չի տվել:

Գերմանիայի արտաքին գործերի նախարարության խոսնակ Մարտին Շաֆերն էլ կառավարության խոսնակների ժողովում, հայտարարել է, որ իրենք տեղեկություն չունեն թուրքական մամուլում տեղ գտած այն տեղեկատվության մասին, ըստ որի, Թուրքիայում պաշտոնանկ արված դատախազներ Զեքերյա Օզը և Ջելալ Քարանը գտնվում են Գերմանիայում:

Հիշեցնենք, որ չնայած ՀՀ ԱԱԾ-ի մամուլի ծառայությունից հայտնել էին, որ իրենք թուրք դատախազների՝ Հայաստանում գտնվելու մասին տեղեկությանը չեն տիրապետում, այնուամենայնիվ թուրքական մամուլում շարունակվում է շրջանառվել այն տեսակետը, թե դատախազները փախել են Վրաստամ, ապա՝ Հայաստան, իսկ այնուհետև՝ Գերմանիա:

Աղբյուր` Ermenihaber.am