Կայացել է Պուտինի և Էրդողանի հանդիպումը Մոսկվայում

Տնտեսական14:22, 23 Սեպտեմբեր 2015

Կայացել է Պուտինի և Էրդողանի հանդիպումը Մոսկվայում

Սեպտեմբերի 23-ին Թուրքիայի նախա գահ Ռեջեփ Թայիփ Էրդողանն այցելել է Ռուսաստան՝ մասնակցելու Մոսկվայի ամենամեծ՝ Ուլու Ջամիի բացման արարողությանը:

Թուրքական «mynet.com» լրատվակայքի համաձայն՝ Մոսկվայի 6 մզկիթներից մեկը հանդիսացող և վերջերս 170 մլն դոլարով վերանորոգված Ուլու Ջամիի բացման արարողությանը մասնակցել է նաև Ռուսաստանի նախագահ Վլադիմիր Պուտինը:

Բացման արարողությունից հետո կայացել է երկու երկրների նախագահների հանդիպումը: Հանդիպման ընթացքում Պուտինը նշել է, որ Թուրքիան Ռուսաստանի կարևորագույն գործընկերներից մեկն է և ընդգծել է տնտեսական ու առևտական համագործակցության ընդլայնման անհրաժեշտությունը: Իսկ Էրդողանն էլ նկատել է տվել, որ 2014-ին ռուս-թուրքական առևտրաշրջանառության ծավալը կազմել է 31 մլրդ դոլար, այս տարվա առաջին կիսամյակում՝ 11 մլրդ դոլար: Նա հայտնել է, որ Թուրքիան մտադիր է մինչև 2020 թվականն այդ ցուցանիշը հասցնել 100 մլրդ դոլարի:

Ըստ աղբյուրի՝ Պուտինն ու Էրդողանը քննարկել են երկկողմ հարաբերություններին վերաբերող, ինչպես նաև՝ միջազգային նշանակության խնդիրներ:

Նշենք, որ Ռուսաստանի և Թուրքիայի նախագահները վերջին անգամ հանդիպել էին 2015թ. հունիսի սկզբին՝ Բաքվում: Երկու երկրների նախագահները առաջիկայում կրկին կհանդիպեն սույն թվականի նոյեմբերի 15-16-ին՝ Անթալիայում կայանալիք G-20 գագաթնաժողովի շրջանակներում:

Բացի այդ, նախատեսվում է Պուտինի և Էրդողանի ևս մեկ հանդիպում՝ Ռուսաստանի կազմի մեջ գտնվող Թաթարստանի մայրաքաղաք Կազանում տարեվերջին կայանալիք Ռուսաստան- Թուրքիա բարձրաստիճան համագործակցության կոմիտեի գագաթնաժողովի ժամանակ:

Աղբյուր` Ermenihaber.am