Թուրքիան ԵՄ-ից 3 միլիարդ եվրո է պահանջել փախստականների հոսքը վերահսկելու դիմաց

Միջազգային11:53, 16 Հոկտեմբեր 2015

Թուրքիան ԵՄ-ից 3 միլիարդ եվրո է պահանջել փախստականների հոսքը վերահսկելու դիմաց

Սիրիացի փախստականների հարցով Բրյուսելում կայացած Եվրամիության անդամ պետությունների ղեկավարների ու կառավարությունների խորհրդաժողովից հետո համաձայնության է ձեռք բերվել այդ հարցում Թուրքիայի հետ համագործակցության ծրագիրի շուրջ:

Թուրքական «Mynet» լրատվական կայքը հայտնում է, որ սիրիացի փախստականների հոսքը վերահսկելու դիմաց Թուրքիան ԵՄ-ից պահանջել է 3 միլիարդ եվրո ֆինանսական օգնություն, Թուրքիայի քաղաքացիների համար Շենգենյան գոտու մուտքի արտոնագրերի գործընթացի դյուրացում և առաջընթաց եվրաանդամակցության բանակցություններում:

ԵՄ ղեկավարների գագաթնաժողովից հետո արված հայտարարության մեջ Եվրոպական խորհրդի նախագահ Դոնալդ Տուսկը հայնտել է, որ Թուրքիայից Եվրոպա անցնող փախստականների հոսքը վերահսկելու հարցում գործողությունների ծրագրի շուրջ համաձայնության գալը մեծ քայլ է:

Սակայն, ինչպես գրում է թուրքական աղբյուրը, հստակ տեղեկություններ չկան, թե այդ գործողությունների ծրագրի շրջանակներում ինչ չափով են բավարարվել Թուրքիայի պայմանները:

Իսկ ահա Գերմանիայի կանցլեր Անգելա Մերկելը հաստատել է, որ ԵՄ-ին Թուրքիայի անդամակցության հարցում առաջընթաց կլինի:

Իսկ ինչ վերաբերում է ֆինանսական օգնությանը, ապա Եվրոպական հանձնաժողովի նախագահ Ժան-Կլոդ Յունկերը տեղեկացրել է, որ օգնության ընդհանուր գումարի շուրջ թուրք պաշտոնյաների հետ բանակցությունները առաջիկայում շարունակվելու են:

Յունկերը, խոսելով մուտքի արտոնագրի գործընթացի հեշտացման մասին, ասել է, որ ԵՄ-ն այդ հարցում աշխատանքները կարագացնի:

Աղբյուր` Ermenihaber.am