Ի՞նչ տնտեսական խոստումներ է տվել Թուրքիայի իշխող կուսակցությունն ընտրություններից առաջ

Տնտեսական09:55, 03 Նոյեմբեր 2015

Ի՞նչ տնտեսական խոստումներ է տվել Թուրքիայի իշխող կուսակցությունն ընտրություններից առաջ

Արտահերթ խորհրդարանական ընտրություններում Թուրքիայի իշխող «Արդարություն և զարգացում կուսակցությունը» (ԱԶԿ-AKP), հավաքելով 49 տոկոս ձայն (317 պատգամավոր), հնարավորություն է ստացել միակուսակցական կառավարություն ձևավորել:

«CnnTürk» լրատվական ծառայությունը ներկայացրել է ԱԶԿ-ի նախընտրական ծրագրում տեղ գտած տնտեսական խոստումները: Ըստ այդմ՝ նվազագույն աշխատավարձը պետք է դառնա 1300 թուրքական լիրա (մոտ 460 դոլար): 2015 թվականի ընթացքում նվազագույն աշխատավարձը եղել 1273 լիրա, որն առանց հարկերի կազմում է 1000 լիրա: Կենսաթոշակը պիտի բարձրացվի 1200 լիրայով (425 դոլար): Մի շարք արտոնություններ կտրվեն ուսանողներին և երիտասարդ սկսնակ գործարարներին:

ԱԶԿ-ի խոստումների համաձայն՝ պետք է ստեղծվեն «կարիերայի կենտրոններ», որոնց գործառույթը կլինի օգնել երիտասարդներին կազմակերպել իրենց բարձրագույն կրթության և կարիերայի հետ կապված հարցերը: Իսկ երիտասարդների շրջանում գործազրկությունը կանխելու համար կմշակվի «երիտասարդների զբաղվածության ռազմավարական փաստաթուղթ»:

Երիտասարդները, որոնք կցանկանան բիզնես սկսել, անվարձահատույց մինչև 50.000 լիրա (շուրջ 18հզ դոլար) կանխիկ գումար կստանան: Նրանց կտրվի նաև առանց տոկոսադրույքի մինչև 100 հազար լիրայի վարկ: Նոր բիզնես հիմնած երիտասարդ գործարարները 3 տարի ժամկետով կազատվեն եկամտահարկից: Պետությունը 1 տարի շարունակ կվճարի առաջին անգամ աշխատանքի ընդունված երիտասարդների աշխատավարձը:

Մայրերին աջակցող ծրագրի շրջանակներում պետությունն առաջին երեխայի համար նրանց կհատկացնի 300 լիրա (105 դոլար), 2-րդ երեխայի համար՝ 400 (140 դոլար), իսկ 3 և ավելի երեխաների համար՝ 600 (210 դոլար) լիրա:

Աղբյուր` Ermenihaber.am