Հետազոտություն. Թուրքիայում փոքրամասնությունների վրա ճնշումներ կան նաև վիրտուալ տիրույթում

Տարածաշրջան10:41, 04 Նոյեմբեր 2015

Հետազոտություն. Թուրքիայում փոքրամասնությունների վրա ճնշումներ կան նաև վիրտուալ տիրույթում

Թուրքիայում առաջին անգամ քրիստոնեական հիմնադրամը սոցմեդիայում փոքրամասնությունների նկատմամբ կիրառվող «ատելության լեզվի» վերաբերյալ ուսումնաիրություն է կատարել:

Ըստ թուրքական «gercekgundem.com» լրատվական կայքի` Ստամբուլի Սարըյեր շրջանի հունական եկեղեցու կողմից իրականացվող «Եվրոպական միություն» նախագծի շրջանակներում կատարված սոցհարցումն իրականացվել է «Բիլգի» համալսարանի և «Konda» սոցիոլոգիական ուսումնասիրությունների կենտրոնի հետ համատեղ:

Հարցվածների միայն 20%-ն է հայտարարել, որ սոցմեդիայում կարողանում է ազատ արտահայտվել: Մնացած 80%-ը նշել է, որ ամաչում իր մտքերն արտահայտել կամ չի կարողանում կիսվել իր մտքերով:

Հարցվածների 80%-ը նշել է, որ Թուրքիայում պետք է որևէ իրավական պատիժ գործի սոցմեդիայում մարդու իրավունքների խախտման կամ խտրականության վերաբերյալ:

Հարցմանը մասնակցած անձանց 86%-ը նշել է, որ սոցցանցերում գրանցված է իր իսկական անունով: 2%-ը նշել է, որ գրանցված է կեղծ անունով, 12%-ն էլ նշել է, որ գրանցված է և իսկական, և կեղծ անուններով:

Մասնակիցների 60%-ը նշել է, որ սոցցանցերից օգտվելն օգնել է սեփական համայնքի տարբեր շերտերի հետ կապեր հաստատել կամ սերտացնել եղած կապերը:

Հարցումից պարզ է դարձել նաև, որ Թուրքիայի ազգային փոքրամասնություններն ամենից շատ օգտվում են «Facebook», «YouTube» և «Instagram» սոցիալական ցանցերից:

Հունվարի 30-ից ապրիլի 17-ն ընկած ժամանակահատվածում իրականացված սոցհարցմանը մասնակցել են Թուրքիայի հայկական, հունական, ասորական և հրեական համայնքի 746 ներկայացուցիչներ:

Թեմայի վերաբերյալ դիտարկումներ է ներկայացրել «Բիլգի» համալսարանի իրավաբանական ֆակուլտետի դասախոսական խորհրդի անդամ դոկտոր Ուլաշ Քարանը: Վերջինը նշել է, որ փոքրամասնությունների ներկայացուցիչները սոցմեդիայում հաճախակի հանդիպում են ատելություն պարունակող արտահայտությունների, սակայն նման դեպքերի համար օրենքով նախատեսված պատիժներ չկան: «Թուրքիայի քրեական օրենսգրիքի 216 հոդվածը (ժողովրդին թշնամության և ատելության դրդելը) պետք է տարածվի նմանատիպ դեպքերի վրա»,- ասել է Քարանը:

Աղբյուր` Ermenihaber.am