ԱՄՆ-ն այլևս զենք-զինամթերքով չի օգնի Սիրիայի քրդական ուժերին

Միջազգային07:43, 05 Նոյեմբեր 2015

ԱՄՆ-ն այլևս զենք-զինամթերքով չի օգնի Սիրիայի քրդական ուժերին

Միացյալ Նահանգներն այլևս զենք-զինամթերքով չի աջակցի Սիրիայում մարտնչող «Ժողովրդական ինքնապաշտպանական ջոկատներ»-ին (ԺԻՋ-YPG): Վերջինս հանդիսանում է քրդական «Ժողովրդավարական միություն կուսակցության» (ԺՄԿ-PYD) ռազմական թևը:

Ըստ թուրքական «haberler» լրատվակայքի՝ այդ մասին հայտարարել է ԱՄՆ-ի կողմից Իրաքում և Սիրիայում «Իսլամական պետություն» (ԻՊ) ահաբեկչական կազմակերպության դեմ իրականացվող «Բնական կայունություն» օպերացիայի խոսնակ գնդապետ Վարրենը: Բաղդադից տեսակամուրջի միջոցով Պենտագոնում կազմակերպված մամուլի ասուլիսի ժամանակ նա տեղեկացրել է, որ ԱՄՆ-ի կողմից այսուհետև զենք-զինամթերք տրամադրվելու է միայն սիրիական «չափավոր» ընդդիմությանը՝ արաբների ղեկավարած ընդդիմադիր ուժերին:

«Հետայսու սա է լինելու մեր քաղաքականությունը»:

Հիշեցնենք, որ ավելի վաղ թուրքական կողմը, ի դեմս վարչապետ Դավութօղլու, մտահոգություն էր հայտնել ԱՄՆ-ի կողմից Սիրիայի քրդական ուժերին զենքով տրամադրելու կապակցությամբ: Այժմ թուրքական լրատվամիջոցները YPG-ին զենքի տրամադրման դադարեցումը համարում են թուրքական կողմից գործադրած ջանքերի պտուղ:

Աղբյուր` Ermenihaber.am