Թուրքիայում ներգնա տուրիզմը նկատելի անկում է ապրել

Տնտեսական13:23, 05 Նոյեմբեր 2015

Թուրքիայում ներգնա տուրիզմը նկատելի անկում է ապրել

2015թ. Թուրքիայում գրանցվել է ներգնա տուրիզմի նկատելի պասիվացում: Թուրքական «Hürriyet» պարբերականի կայքի տեղեկացմամբ՝ այս տարին Թուրքիայի համար նպաստավոր չի եղել և արտագնա, ոչ էլ ներգնա տուրիզմի տեսակետից:

Թուրքիայի վիճակագրական ընկերության (TÜİK) տվյալների համաձայն՝ 2015թ. ապրիլ-մայիս-հունիս ամիսներին ներգնա տուրիզմի ակտիվությունը նվազել է 17 տոկոսով: Ըստ նշյալ աղբյուրի՝ ապրիլ-մայիս-հունիս եռամսյակում ընդհանուր առմամբ Թուրքիայի ներսում ճանապարհորդել է 10.372.000 մարդ, որոնց կողմից մեկ կամ մի քանի օրվա համար հյուրանոցներում կատարված ամրագրումների ընդհանուր թիվը կազմել է 13 մլն:

Թուրքիայի վիճակագրական ընկերությունը նաև պարզել է, որ երկրի ներսում ճանապարհորդողների 65 տոկոսը նպատակ է ունեցել այցելել հարազատներին ու ընկերներին, 7.7 տոկոսը ճանապարհորդել է բուժման, իսկ 17 տոկոսը՝ զվարճանալու, շրջելու, հանգստանալու նպատակով: Նշվում է նաև, որ երկրի ներսում շրջագայող զբոսաշրջիկների 92.1 տոկոսը գիշերելու համար նախընտրել է բարեկամների, ծանոթների, ընկերներ տները: Եվ միայն 7.9 տոկոսն է նախապատվություն տվել հյուրանոցներին:

Նվազել է նաև ներգնա զբոսաշրջության ապահոված եկամտի ծավալը: 2014թ. նույն եռամսյակի համեմատ այս ոլորտի եկամուտը նվազել է 6.7 տոկոսով՝ կազմելով 4.38 մլրդ լիրա ( մոտ 1.56 մլրդ դոլար): Նշված գումարի 91.6 տոկոսը կազմել են անհատական, ինքնուրույն ճանապարհորդող քաղաքացիների ծախսած գումարները, իսկ 8.4 տոկոսը՝ տուրիստական ընկերությունների հետ ճանապարհորդողների ծախսած գումարները: Այսպիսով, ապրիլ-հունիս ամիսներին Թուրքիայի սահմանների ներսում ճանապարհորդած յուրաքանչյուր քաղաքացի միջինում ծախսել է 336 լիրա (մոտ 120 դոլար):

Աղբյուր` Ermenihaber.am