Ռուս զբոսաշրջիկները սկսել են ավելի շատ մեկնել Թուրքիա

Տնտեսական09:18, 09 Նոյեմբեր 2015

Ռուս զբոսաշրջիկները սկսել են ավելի շատ մեկնել Թուրքիա

Հոկտեմբերի 31–ին տեղի ունեցած ողբերգական ավիավթարից հետո ռուս զբոսաշրջիկները սկսել են հանգստի համար նախապատվություն տալ Թուրքիային: Այս մասին տեեկացնում է թուրքական «Hürriyet» պարբերականի կայքը՝ հիշեցնելով, որ Ռուսաստանում առկա տնտեսական խնդիրների պատճառով վերջին շրջանում ռուսները կտրուկ նվազեցրել էին Թուրքիա այցելությունները, ինչի պատճառով զբոսաշրջության հայտնի կենտրոն հանդիսացող Անթալիան, օրինակ, 5 մլրդ. դոլարի «վնաս էր կրել»:

Աղբյուրի հավաստմամբ՝ տուր-օպերատորները վերջին իրադարձություններից հետո մատչելի գնով հանգստյան վայրեր փնտրող ռուս զբոսաշրջիկներին կրկին սկսել են առաջարկել զբոսաշրջային տուրեր դեպի Թուրքիայի տարբեր քաղաքներ: Ռուսաստանի վարչապետի օգնական Դմիտրի Դվորկովիչը լրագրողների հետ զրույցում տեղեկացրել է, որ ավելի վաղ դեպի Եգիպտոս ինքնաթիռի տոմսեր գնած Ռուսաստանի քաղաքացիների 20-30 տոկոսը վերադարձնում է տոմսեը՝ փոխարենը նախընտրելով մեկնել Թուրքիա: Իսկ մնացած մասը կամ հետաձգում է արձակուրդը, կամ ընդհանրապես նախընտրում հետ վերցնել գումարը:

Շարմ Էլ Շեյխ-Սանկտ Պետերբուրգ չվերթն իրականացնող ինքնաթիռի կործանումից հետո Ռուսաստանը շարունակում է դատարկ ինքնաթիռներ ուղարկել Եգիպտոս՝ այնտեղ գտնվող շուրջ 80.000 ռուս զբոսաշրջիկներին Ռուսաստան վերադարձնելու համար: Նշվում է նաև, որ մինչ այժմ արդեն 1200 ռուս զբոսաշրջիկ է Եգիպտոսից վերադարձել: Այս թռիչքների ժամանակ ուղևորներին արգելվում է իրենց հետ ճամպրուկներ վերցնել: Դրանք պետք է Ռուսաստան ուղարկվեն ավելի ուշ:

Աղբյուր` Ermenihaber.am