Haberler. «Թուրքիայի` պարետային ժամ հայտարարված շրջաններում 60 քուրդ զինյալ է սպանվել»

Տարածաշրջան09:55, 18 Դեկտեմբեր 2015

Haberler. «Թուրքիայի` պարետային ժամ հայտարարված շրջաններում 60 քուրդ զինյալ է սպանվել»

Թուրքիայի` վերջին օրերին պարետային ժամ (փողոց դուրս գալու արգելք) հայտարարված շրջաններում 10.000 ուժայինի մասնակցությամբ անցկացվող հատուկ գործողությունների ընթացքում սպանվել է երկրում ահաբեկչական համարվող «Քուրդիստանի բանվորական կուսակցության» (ՔԲԿ-PKK) 60 զինյալ:

Ըստ թուրքական «Haberler.com» լրատվական կայքի` 24 զինյալ սպանվել է Շըրնաք նահանգի Ջիզրե շրջանում ևս մեկը` նույն նահանգի Սիլոփի շրջանում: Դիարբեքիրի Սուր կենտրոնական շրջանում սպանվել է 29, Դարգեչիթում` 6 քուրդ գրոհային:

Թուրքիայի զինված ուժերի գլխավոր շտաբը հաղորդել է Ջիզրեում և Սիլոփիում իրականացված գործողությունների ընթացքում 8 թուրք ուժայինի վիրավորվելու մասին: Աղբյուրը նշում է, որ նշյալ 2 շրջաններում անցկացված գործողությունների ընթացքում կիրառվել են ուղղաթիռներ տանկեր և այլ զրահատեխնիկա:

Ջիզրեում ուժայինների ու քուրդ զինյալների բախումների ժամանակ զոհվել է Հեդիյե Շեն անունով 30-ամյա մի բնակչուհի: Սիլոփիում ու Ջիզրեում ավերվել կամ այրվել են բազմաթիվ շենքեր, այդ թվում` դպրոցներ: Խափանվել են ենթակառուցվածքների աշխատանքները:

Դեկտեմբերի 2-ից մինչ այսօր պարետային ժամի պայմաններում ոստիկանության կողմից իրականացվող գործողությունների հետևանքով Դիարբեքիրի Սուր շրջանի 23.000 քուրդ բնակչությունից 20.000-ը գաղթել է: Թուրքական պաշտոնական լրատվությունը հաղորդել է նշյալ ժամանակահատվածում շրջանում 29 քուրդ զինյալի սպանվելու և 2 թուրք հատուկջոկատային վիրավորվելու մասին: Նշվում է, որ Սուրի 6 թաղամասում խուզարկվել է 3.000 բնակարան:

Մարդինի Դարգեչիթ շրջանում էլ, որտեղ արդեն 8-րդ օրն է, ինչ պարետային ժամ է, շարունակվում են բախումները (սպանվել է 6 PKK-ական):

Աղբյուր` Ermenihaber.am