Թուրքիան պատժամիջոցներ է կիրառել ռուսական 3 ընկերությունների դեմ

Տնտեսական09:15, 26 Հունվար 2016

Թուրքիան պատժամիջոցներ է կիրառել ռուսական 3 ընկերությունների դեմ

Ռուսաստանի կողմից Թուրքիայի դեմ կիրառվող պատժամիջոցներից հետո Թուրքիան առաջին պատասխան քայլն է ձեռնարկել:

Թուրքական «haberexen.com» լրատվական կայքը, հղում անելով ռուսական «Коммерсант» թերթին, գրում է, որ Թուրքիան 14 տոկոսանոց հարկ է սահմանել 3 խոշոր ռուսական մետաղաձուլական ընկերությունների վրա, որոնք իրենց արտադրանքն արտահանում են Թուրքիա:

Նշվում է, որ ռուսական ընկերությունների վրա այս հարկաչափի կիրառումը, Թուրքիայի տեղական արտադրողների` թուրքական շուկայում օտարերկրյա ընկերությունների կողմից կիրառված դեմպինգի (արտահանվող ապրանքի վաճառքը ներմուծող երկրի շուկայի գներից ավելի ցածր գնով) դեմ բողոքի հետևանքն է:

Բողոքի հիման վրա դեռ 2015-ի հունվարին սկսված հետաքննության արդյունքները, սակայն, հրապարակվել են 2016-ի հունվարի 22-ին:

Հետաքննությունից պարզվել է, որ ռուսական ընկերություններն իրենց ապրանքները թուրքական շուկայում վաճառել են 13.66 տոկոսով ավելի էժան, քան շուկայում գործող գինն է: Այդ թվին համապատասխան նշանակվել է 14 տոկոսանոց հարկ, որը կվճարեն ռուսական ընկերությունները:

Աղբյուրը հաղորդում է նաև, որ հետաքննության որոշմամբ լրացուցիչ հարկ է սահմանվել միայն ռուսական ընկերությունների վրա` չնայած այն հանգամանքին, որ ուկրաինական ընկերությունները թուրքական շուկայում ավելի էժան մետաղաձուլական արտադրանքներ են վաճառում, քան` ռուսականները:

Նշենք նաև, որ ռուսական 3 խոշոր ընկերություններն ապահովում են Թուրքիաի պահանջարկի 19 տոկոսը:

Աղբյուր` Ermenihaber.am