ERMENI HABER AJANSI

Թուրքիայի բանտերում ազատ տեղեր գրեթե չկան, եղածներն էլ արագորեն սպառվում են:

BBC -ի թուրքական ծառայության տեղեկատվության համաձայն՝ միջազգային ուսումնասիրությունները ցույց են տվել, որ  բանտերում ամենամեծ թվով  դատապարտյալ ունեցող երկրների ցուցակում Թուրքիան  աշխարհում 9-րդն է:

Թուրքական բանտերը գերզբաղված են, բանտարկյալներին տեղավորելու համար խցերում տեղադրվում են եռահարկ մահճակալներ, որպես բանտախուց են օգտագործվում բանտերի միջանցքները: Բանտարկյալների իրավունքները խախտվում են: Որոշ բանտերում 2 բանտարկյալին հատկացվում է մեկ անկողին: Երբեմն նույնիսկ քնելու համար հերթապահություն են սահմանում. բանտարկյալների մի մասը գիշերն է քնում իսկ մյուս մասը ` ցերեկը: 

Թուրքիայի արդարադատության նախարարությանն առընթեր Բանտերի և կալանավայրերի գլխավոր տնօրեն Յավուզ Յըլդըրըմը բանտերի վիճակի վերաբերյալ գրավոր հայտարարության համաձայն՝ 2016թ. հունվարի 13-ի դրությամբ Թուրքիայում դատապարտյալների  և կալանավորների ընդհանուր թիվը կազմել է 179.611:  Համեմատության համար նշենք, որ 2006թ. այս երկրում գրանցվել է ընդամենը 70.277 բանտարկյալ:

Նշվում է նաև, որ ևս 56.772 դատապարտյալ իր պատիժը կրում է պայմանական ազատության մեջ: Իսկ 2492 հոգի վերահսկվում է էլեկտրոնային ձեռնաշղթաների միջոցով:

Երկրում այսօր գործում են 290 փակ ռեժիմի, 59 բաց ռեժիմի, 3 մանկական (փակ ռեժիմի) քրեակատարողական հիմնարկ, 2 մանկական ուղղիչ աշխատանքային տուն, բաց և փակ ռեժիմի 9 կանանց քրեակատարողական հիմնարկ: Բանտերի ընդհանուր տարողունակությունը կազմում է 180.176:

Ըստ Յըլդըրըմի՝ առաջիկա 4 տարվա ընթացքում նախատեսվում է կառուցել ևս 165 բանտ, միաժամանակ կփակվի 131 հին կալանավայր: