Թուրքական դատարանը Պոլսի հայոց պատրիարքի համար խնամակալ է նշանակել

Իրավական09:51, 10 Մարտ 2016

Թուրքական դատարանը Պոլսի հայոց պատրիարքի համար խնամակալ է նշանակել

Թուրքական դատարանը բավարարեց Պոլսի Հայոց պատրիարք Մեսրոպ Մութաֆյանի խնամակալության հայցը: Պատրիարքի խնամակալ է նշանակվել նրա 78-ամյա մայրը՝ Մարի Մութաֆյանը:

Թուրքական «Superhaber» լրատվական կայքը տեղեկացնում է, որ դատարանի որոշմամբ՝ Մարի Մութաֆյանն իրավունք է ստանում ներկայացնել որդու շահերը պետական հաստատություններում, ինչպես նաև ստանալ նրա աշխատավարձը:

Խնամակալության համար դատարան դիմած հայցվորներից Թաթյոս Բեբեքը հայտարարել է, որ դատարանի որոշմամբ Մութաֆյանն այլևս պատրիարք չէ և պետք է նոր պատրիարքի համար ընտրություն անցկացնել:

Մեսրոպ Մութաֆյանը Պոլսի հայոց պատրիարք էր ընտրվել 1998 թվականին: 2008 թվականից ի վեր պատրիարք Մութաֆյանը հիվանդության պատճառով գտնվում է հիվանդանոցում: Իսկ պատրիարքությունը ղեկավարում է հոգևոր խորհրդի կողմից պատրիարքական փոխանորդ ընտրված Արամ արքեպիսկոպոս Աթեշյանը:

Աղբյուր` Ermenihaber.am