Փորձագետների մեկնաբանությունները Անկարայում տեղի ունեցած պայթյունի վերաբերյալ

Տարածաշրջան09:13, 16 Մարտ 2016

Փորձագետների մեկնաբանությունները Անկարայում տեղի ունեցած պայթյունի վերաբերյալ

Մարտի 13-ին Անկարայի կենտրոնական Քըզըլայ շրջանում տեղի ունեցած ահաբեկչական պայթյունի վերաբերյալ փորձագիտական շրջանակներում շարունակում են մեկնաբանություններ և գնահատականներ տրվել:

Ըստ թուրքական «aktifhaber» լրատվամիջոցի` 37 մարդու մահվան պատճառ դարձած ահաբեկչական հարձակման մասին «Reuters» լրատվական գործակալության հետ է զրուցել ազգությամբ թուրք անվտանգության հարցերով փորձագետ, նախկին սպա Մեթին Գյուրջայը:

Վերջինս նկատել է տվել, որ նմանատիպ ահաբեկչական գործողությունները Սիրիայում և Իրաքում ապրողների առօրյայի անբաժան մասն են կազմում:

«Ահաբեկչական գործողություններում մեքենաների կիրառելը Թուրքիայի համար նոր երևույթ է: Թուրքիայում էլ են հաճախակիացել այդօրինակ հարձակումները»:

Իսկ նախկին հատուկջոկատային, սպա Մեթե Յարարը, որն այժմ անվտանգության հարցերով վերլուծաբան է, այն համոզմունքին է, որ «Քուրդիստանի բանվորական կուսակցության» (ՔԲԿ-PKK) զինյալները Սիրիայում և Իրաքում գտնվող զինանոցներից վերցնում են մեծ թվով պայթուցիկներ: Որպես դրա ապացույց նա նշում է, որ այդ տեսակ պայթուցիկները, որոնք հանդիպում են PKK-ի զինյալների մոտ, հնարավոր չէ գնել զենքի շուկայում:

«Crisis» խմբի Թուրքիայի գծով փորձագետ Նիգար Գյոքսել նշել է, որ թե Թուրքիան, թե քրդական ուժերը գիտեն, որ այդ խնդիրը ռազմական ճանապարհով չի կարգավորվելու: Նրա կարծիքով` ի վերջո, երկու կողմերն էլ նստելու են բանակցային սեղանի շուրջ, սակայն միևնույն ժամանակ երկուսն էլ ձգտում են բարենպաստ դիրքերով ունենալով գնալ բանակցությունների:

Նշյալ առիթով խոսել է նաև գրող Ալիզա Մարկուսը, որը հեղինակել է PKK-ի մասին պատմող «Արյուն և հավատ» գիրքը: Ըստ նրա՝ PKK-ի ու Թուրքիայի միջև մղվող պատերազմում նոր ու վտանգավոր միտումներ են նշմարվում:

Աղբյուր` Ermenihaber.am