ERMENI HABER AJANSI

Թուրքիայի կողմից օտարերկրյա մի շարք լրագրողներին սև ցուցակի մեջ ներառելու և Թուրքիայում նրանց աշխատանքը խոչընդոտելու փաստը քննադատության է ենթարկվել միջազգային հանրության կողմից:

Մասնավորապես, ինչպես փոխանցում է «CNNTurk»-ը` Թուրքիայի նման գործելաոճը քննադատության է արժանացել Եվրախորհրդարանի (ԵԽ) նախագահի, Գերմանիայի արտգործնախարարության  և մի շարք այլ կառույցների կողմից:

ԵԽ-ի նախագահ Մարթին Շուլցը,  գերմանական «Bild» պարբերականի հետ զրույցում հորդորել է Թուրքիային ձերբազատվել այդ ցուցակից՝ նշելով, որ այն հակասում է ժողովրդավարութան սկզբունքներին:

Թեմային անդրադարձել է նաև Գերմանիայի «Քրիստոնյա դեմոկրատների  միություն» կուսակցության անդամ, պատգամավոր Կարլ Գեորգ Վելմանը:

«Եթե այդպիսի ցուցակ կա, ապա այն անհապաղ պետք է հրապարակվի»- շեշտել է պատգամավորը:
Իսկ Գերմանիայի արտգործնախարարության խոսնակը իր հերթին նշել է, որ Դաշնային կառավարությունը ակնկալում է  Թուրքիայից, որ գերմանացի լրագրողների  աշխատանքը այդ երկրում չի խոչընդոտվի:

Թուրքական աղբյուր նշում է, որ «Bild»-ի  թղթակցին նույնպես, որի հավանաբար ներառված է այդ ցուցակում, նախորդ շաբաթ թույլ չեն տվել մուտք գործել Թուրքիայի Ստամբուլ քաղաք:

Հիշեցնենք, որ ավելի վաղ էլ գերմանական «ARD» հեռուստակաընկերության թղթակցին չեն թույլատրել գնալ Ստամբուլ: Թղթակիցը պատրաստվում էր ռեպորտաժ անել սիրիացի փախստականների մասին: