Թուրքիան քննադատել է Ռուսաստանին «Ղրիմի թաթարների մեջլիս»-ի գործունեությունն արգելելու համար

Միջազգային09:08, 27 Ապրիլ 2016

Թուրքիան քննադատել է Ռուսաստանին «Ղրիմի թաթարների մեջլիս»-ի գործունեությունն արգելելու համար

Թուրքիայի արտաքին գործերի նախարարությունը Ղրիմի գերագույն դատարանի` «Ղրիմի թաթարների մեջլիս» կազմակերպության գործունեության արգելումը դատապարտող հայտարարություն է տարածել:

Թուրքիայի ԱԳՆ-ի պաշտոնական կայքում հրապարակված հայտարարության մեջ մասնավորապես ասվում է. «Ղրիմի թաթարների մեջլիսի» գործունեության դադարեցումը, Ռուսաստանի կողմից թերակղզին անօրինական կերպով օկուպացնելուց և բռնակցելուց հետո Ղրիմի թաթարների միասնության խաթարմանն ուղղված վերջին քայլն է»:

Հայտարարության մեջ նշվում է, որ Թուրքիան ռուսական կողմի որոշումն ընդունում է որպես Ղրիմի թաթարական համայնքի դեմ իրականացվող համակարգային ճնշումների ևս մեկ դրսևորում և խստորեն քննադատում այն:

«Թուրքիան շարունակելու է վճռական աջակցություն ցույց տալ Ղրիմի թաթարների արդարացի պայքարին և նրանց վրա գործադրվող նմանատիպ ճնշումների դադարեցմանն ուղղված ջանքերին»,- ասված է հայտարարության եզրափակիչ մասում:

Ղրիմի Գերագույն դատարանը ապրիլի 26-ին կայացրած որոշմամբ «Ղրիմի թաթարների մեջլիսը» որակել է ծայրահեղական կազմակերպություն և արգելել դրա գործունեությունը Ղրիմում և Ռուսաստանի ողջ տարածքում: Գլխավոր դատախազության տվյալներով` մեջլիսը «ծավալում է հակառուսական գործունեություն», իսկ նրա առաջնորդները «համագործակցում են ահաբեկչական կազմակերպությունների, այդ թվում` թուրքական «Գորշ գայլեր»-ի հետ»:

Ապրիլի 18-ին ՌԴ արդարադատության նախարարությունը Մեջլիսը ներառել էր այն կազմակերպությունների թվում, որոնց գործունեությունը կասեցվել է ծայրահեղական գործունեության պատճառով:

Աղբյուր` Ermenihaber.am