ERMENI HABER AJANSI

Դիարբեքիրի հանրապետական գլխավոր դատախազությունը քրդամետ «Ժողովուրդների դեմոկրատական կուսակցության» (ԺԴԿ-HDP) նախկին պատգամավոր Սեբահաթին Թունջելի նկատմամբ մեղադրական եզրակացություն է ներկայցրել դատարան:

Թուրքական «Zaman» թերթի տեղեկացմամբ՝ ծանր հանցագործույթյունների դատարանն ընդունել է մեղադրական եզրակացությունը, որը Թունջելի նկատմամբ պահանջում է 8-20 տարվա ազատազրկում՝ «զինված ահաբեկչական կազմակերպությանն անդամակցելու» և «զինված ահաբեկչական կազմակերպության օգտին քարոզչություն անելու» մեղադրանքով:

Մեղադրականում նշվում է, որ կասկածյալ Թունջելը, երբ դեռ քրդական «Խաղաղություն և ժողովրդավարություն» կուսակցության (ԽԺԿ-BDP) պատգամավորն էր, աշխատել է Թուրքիայում «Քուրդիստանի բանվորական կուսակցության» (ՔԲԿ-PKK) անունից գործունեություն ծավալող «Քուրդիստանի համայնքների միության Թուրքիայի մեջլիս» կազմավորման շրջանակներում:

Նշվում է, որ Թուրքիայի Քայափընար գավառում տներից մեկի խուզարկության ժամանակ առգրավվել է հիշողության կրիչ, որի պարունակության ուսումնասիրությունները, ինչպես նաև Թունջելի և քրդական մեկ այլ «Ժողովրդավարական շրջաններ կուսակցության» համանախագահ Քամուրան Յուքսեի հեռախոսազրույցների ձայնագրությունները նույնպես ներառվել են մեղադրական մեջ:

Ըստ մեղադրականի՝  ամբաստանյալը «Քուրդիստանի համայնքների միության» (KCK) ղեկավարության հետ հանդիպելու նպատակով եղել է Բրյուսել:

Մեղադրականն ընդունած դատարանը որոշում է կայացրել կասկածյալ Թունջելի գործը միավորել KCK-ի գործով ընթացող հիմնական դատավարությանը՝ հիմք ընդունելով, որ Թունջելի գործն իրավականորեն և գործնականում կապված է KCK-ի գործի հետ: