Թուրքիայի ռազմարդյունաբերությունն աշխատում է նոր սերնդի զենքերի նախագծման վրա

Տարածաշրջան11:14, 22 Հունիս 2016

Թուրքիայի ռազմարդյունաբերությունն աշխատում է նոր սերնդի զենքերի նախագծման վրա

Օրեր առաջ թուրքական արտադրության ռազմանավի՝ ծով իջեցման արարողությանը մասնակցած երկրի նախագահ Ռեջեփ Թայիփ Էրդողանն իր ելույթում հայտարարել է, որ իրենց համար արդեն եկել է ավիակիր ռազմանավեր արտադրելու ժամանակը:

Թուրքական «Milliyet» թերթի կայքը տեղեկություններ է ներկայացրել որոշ նոր նախագծերի, ինչպես նաև արդեն բանակի սպառազինության մեջ մտած զինատեսակների նոր սերունդների նախատիպերի վերաբերյալ:

Նմանատիպ նոր նախագծերից մեկն է այս պահին վերջին փորձարկումներն անցնող «Hürkuş» ուսումնական ինքնաթիռը: Նախատեսվում է, որ ինքնաթիռը 2017 թվականից սկսած ակտիվորեն կօգտագործվի թուրքական զինված ուժերի կողմից: Դեռևս նախագծման փուլում գտնվող «Hürkuş-C» տարբերակը լինելու է մարտական ու գործողություններ է կատարելու կարճ տարածությունների վրա:

Տիեզերք ուղարկած «Göktürk-2» անվանումով արբանյակից հետո Թուրքիայում նախատեսում են բաց թողնել «Göktürk-1» անունով ավելի հագեցված արբանյակը, որն այդ երկրին թույլ կտա 2017-ից տարածաշրջանի զարգացումներին տիեզերքից հետևել սեփական միջոցներով:

Աղբյուրի հաղորդմամբ` աշխատանքներ են իրականացվում նաև հեռահար և բարձրաթռիչք հրթիռների նախագծման գործում: Նշվում է, որ այժմ Թուրքիայի սպառազինության մեջ կիրառվում են տեղական արտադրության «Hisar-A» և «Hisar-O» հրթիռները, որոնք միջին և փոքր հեռահարություն ունեն:

Մոդեռնիզացվում և հագեցվում են նաև «Anka» թուրքական արտադրության անօդաչու թռչող սարքերը: «Anka-S» մոդելի ԱԹՍ-ն կլինի ինքնավոչնչացվող:

Նշվում է, որ 2017 թվականից թուրքական ԶՈւ սպառազինության մեջ կընդգրկվեն նաև տեղական արտադրության «Altay» տանկերը, որոնց փորձարկումների ավարտը նախատեսված է այս տարվա հոկտեմբերին:

Աղբյուր` Ermenihaber.am