ԱՄՆ պետքարտուղարության խոսնակը պատասխանել է Գյուլենին հանձնելու վերաբերյալ Թուրքիայի պահանջին

Միջազգային07:36, 20 Հուլիս 2016

ԱՄՆ պետքարտուղարության խոսնակը պատասխանել է Գյուլենին հանձնելու վերաբերյալ Թուրքիայի պահանջին

ԱՄՆ պետքարտուղարության մամուլի խոսնակ Մարկ Թոները մեկնաբանություններ է արել Ֆեթհուլլահ Գյուլենին արտահանձնելու վերաբերյալ Թուրքիայի պաշտոնական դիմումի առթիվ:

Թուրքական «Haber.net» լրատվակայքի տեղեկացմամբ՝ Թոները մասնավորապես նշել է, որ այս խնդիրի լուծումը ժամանակ է պահանջում. «Սա մեկ գիշերում լուծվող հարց չէ, այս գործընթացի համար որոշակի ժամանակ կպահանջվի»,- ասել է նա:

ԱՄՆ պետքարտուղարության խոսնակն ընդգծել է, որ Թուրքիան հեղաշրջման ձախողված փորձից հետո շատ վտանգավոր դրության մեջ է և նշել, որ ԱՄՆ-ն ուշադրությամբ հետևում է հուլիսի 15-ի դեպքերի կապակցությամբ ընթացող ձերբակալություններին և հավաքներին:

Թոները հիշեցրել է նաև, որ իրենք Թուրքիայի կառավարությանը կոչ են արել հանդարտություն և կայունություն պահպանել, հավատարիմ մնալ ժողովրդավարական սկզբունքներին և օրենքի առաջ հավասարության չափանիշին:

Իսկ ԱՄՆ պետքարտուղարության մեկ այլ ներկայացուցիչ թուրքական պետական «Anadolu» լրատվական գործակալության հետ զրույցում հայտնել է, որ Ֆեթհուլլահ Գյուլենի արտահանձնման հարցը դրված է քննարկման նույն կարգով, ինչպես և մյուս նմանատիպ խնդիրներն են քննարկվում: Սակայն պաշտոնյան նշել է, որ հնարավոր չէ կանխապես ասել, թե գործընթացը որքան կարող է տևել:

Հիշեցնենք, որ հունիսի 15-ի ուշ երեկոյան Թուրքիայում կատարված հեղաշրջման փորձի կազմակերպման մեջ նախագահ Ռեջեփ Թայիփ Էրդողանը մեղարդրում է այսպես կոչված «զուգահեռ կառույցի» ղեկավար Ֆթհուլլահ Գյուլենին, ով բնակվում է ԱՄՆ-ում: Այս համատեքստում Թուրքիան պաշտոնապես պահանջել է ԱՄՆ-ից՝ արտահանձնել Գյուլենին:

Աղբյուր` Ermenihaber.am