Թուրքիայում իսլամի դասերից ազատելու համար հայերից մկրտության փաստաթուղթ են պահանջում

Հասարակական13:58, 28 Սեպտեմբեր 2016

Թուրքիայում իսլամի դասերից ազատելու համար հայերից մկրտության փաստաթուղթ են պահանջում

Թուրքիայում ոչ մուսուլման աշակերտներին և մասնավորապես՝ հայ երեխաներին իսլամի դասերից ազատելու համար նրանցից մկրտության փաստաթուղթ են պահանջում: Թուրքական «Bianet» լրատվակայքի տեղեկացմամբ՝ հայ երեխաների ծնողներն ու ներկայացուցիչները չեն հասկանում, թե ինչ իմաստ ունի մկրտության փաստաթուղթ պահանջելը, եթե երեխաների անձնագրային քարտերում նշված է նրանց քրիստոնյա լինելու հանգամանքը:

Չնայած այս տեղեկություններին՝ Բեյօղլուի շրջանային կրթական վարչությունը հերքել է դպրոցներում աշակերտներին նման պահանջ ներկայացնելու մասին լուրը:

Նախորդ տարի նմանատիպ դեպք էր գրանցվել Շիշլիի հայկական Կարագյոզյան դպրոցում: Աշակերտներից մեկը հեռացվել էր դպրոցից՝ մկրտության թուղթ չունենալու և հայ չլինելու պատճառաբանությամբ: Սակայն գործը քննող դատարանը որոշում էր կայացրել, որ հեռացված անձը կարող է ուսումը շարունակել հայկական դպրոցում, քանի որ նրա անձնագրային քարտում կրոնի դաշտում եղել էր «քրիստոնյա» նշումը: Դատարանը վճռել էր, որ երեխային դպրոց չընդունելը օրենքի խախտում է, քանի որ երեխայի ինքնությունը կարելի է պարզել նրա անձնագրային տվյալների հիման վրա:

Թուրքիայի ընդդիմադիր «Ժողովուրդների դեմոկրատական» կուսակցության (ԺԴԿ-HDP) Իզմիրի պատգամավոր Էրթուղրուլ Քյուրքչուն հայ երեխաներից դպրոցներում մկրտության փաստաթուղթ պահանջելու հարցը բերել է Թուրքիայի մեջլիսի օրակարգ: Քյուրքչուն թեմայի վերաբերյալ հատուկ հարցում է ներկայացրել մեջլիս՝ ակնկալելով ազգային կրթության նախարար Իսմեթ Յըլմազի պատասխանը:

Պատգամավորը մասնավորապես փորձել է ճշտել, թե քրիստոնյա աշակերտներին ուղղված այդ քայլը որքանով է հիմնավորված, կա՞ արդյոք նախարարությունից բոլոր դպրոցների տնօրեններին տրված նման հրահանգ: Քյուրքչուն նաև հարց է ուղղել կրթության նախարարին, թե արդյոք նախարարությունը դպրոցի ներկայացուցիչների այս պահանջը չի համարում աշակերտների իրավունքների ոտնահարում: Եվ եթե կրթության նախարարությունը տեղյակ չէ այս դեպքերից, ապա ի՞նչ քայլեր է ձեռնարկել՝ դեպքերը քննելու համար:

Աղբյուր` Ermenihaber.am

Այս ենթաբաժնի վերջին նորությունները

12:22, 25 նոյ

Թուրքիայի բնակչության 54 տոկոսը մեկ և ավելի օտար լեզվի է տիրապետում

Եվրոպայի վիճակագրական ինստիտուտն իրականացրած հետազոտույթունների արդյունքների հիման վրա կազմել է օտար լեզուներ իմացող բնակչությամբ երկրների ցանկը։

14:11, 22 նոյ

Թուրքիան գործարկել է սեփական արտադրության առաջին քվանտային համակարգիչը

Քվանտային համակարգիչները կբարձրացնեն Թուրքիայի մրցունակությունը ռազմարդյունաբերությունից մինչև ֆինանսական տեխնոլոգիաներ:

11:59, 22 նոյ

Թուրքիան ներառված չէ այն երկրների ցանկում, որտեղ Իսրայելի վարչապետը չի կարող մեկնել

Միջազգային քրեական դատարանն Իսրայելի վարչապետին և նախկին պաշտպանության նախարարին «պատերազմական հանցագործության» մեղադրանքով ձերբակալելու որոշում էկայացրել։