Օզդեմիր.«Թուրքիան ժողովրդավարության անվան տակ վերածվում է բռնապետության»

Իրավական09:39, 01 Նոյեմբեր 2016

Օզդեմիր.«Թուրքիան ժողովրդավարության անվան տակ վերածվում է բռնապետության»

Գերմանիայի «Կանաչների» կուսակցության համանախագահ Ջեմ Օզդեմիրը քննադատել է Թուրքիայում մահապատժի վերականգնման ծրագիրը:

«Deutsche Welle»-ի թուրքական ծառայության համաձայն՝ Օզդեմիրը նշել է, որ Թուրքիան ժողովրդավարության անվան տակ վերածվում է յուրատեսակ ժամանակակից բռնապետության:

Մահապատժի վերաբերյալ նախագահ Էրդողանի հայտարարությունները խստորեն քննադատելով՝ թուրքական ծագմամբ գերմանացի պատգամավորը նշել է. «Եթե երկիրը բռնապետության վերածելուց հետո նաև պաշտոնապես վերականգնվի մահապատիժը, դա ևս մեկ անգամ ցույց կտա, թե որքան է Էրդողանը հեռու Եվրամիության և արևմտյան երկրների արժեքներից»:

Նշենք, որ նախօրեին Թուրքիայում մահապատժի վերականգնման դեմ էր արտահայտվել նաև Եվրախորհուրդը: ԵԽ խոսնակ Դանիել Հոլթգենը շեշտել էր, որ մահապատժի կիրառումը չի կարող ներդաշնակվել ԵԽ անդամակցության հետ:

Հիշեցնենք նաև, որ նախորդ շաբաթ Էրդողանը թեմայի վերաբերյալ հետևյալ հայտարարությունն էր արել. «Մահապատիժը մոտ է, մի անհանգստացեք: Կառավարությունը այս հարցը կբերի խորհրդարանի օրակարգ: Ես հավատում եմ, որ խորհրդարանը այն կհաստատի, իսկ հետո ես այդ որոշումը կվավերացնեմ»:

Աղբյուր` Ermenihaber.am