ERMENI HABER AJANSI

Թուրքիայի գլխավոր ընդդիմադիր ուժ համարվող քեմալականների «Ժողովրդահանրապետական կուսակցությունը» (CHP-ԺՀԿ) ընդդիմադիր «Cumhuriyet» թերթի և քրդամետ «Ժողովուրդների դեմոկրատական» կուսակցության (HDP-ԺԴԿ) նկատմամբ հետապնդումները  որակել է ոչ սահմանադրական և անտրամաբանական: 

Թուրքական «Milliyet» թերթի տեղեկացմամբ` գլխավոր ընդդիմադիր կուսակցությունը արտահերթ ժողով է գումարել, որի ժամանակ ընդունված հայտարարության մեջ պահանջում է դադարեցենել «Cumhuriyet» թերթի նկատմամբ սկսված «ոչ իրավական և անտրամաբանական» դատական գործը: «Ֆեթուլլահական ահաբեկչական կազմակերպությանը» (FETÖ` թուրքական մամուլում այսպես է անվանվում իսլամի հայտնի քարոզիչ Ֆեթուլլահ Գյուլենի ստեղծած շարժումը) անդամակցելու մեղադրանքով սկսված իրավական գործընթացը ԺՀԿ-ն բնորոշել է որպես կառավարության կողմից ուղղորդվող և նրա միջամտությամբ սկսված քաղաքական դատավարություն:

ԺՀԿ-ն իշխող «Արդարություն և զարգացում» կուսակցությանը (AKP-ԱԶԿ) մեղադրել է Թուրքիան վատ կառավարելու, պետական ապարատի բոլոր ոլորտներում FETÖ-ի ներկայացուցիչներ նշանակելով, գիտակցաբար և ծրագրված կերպով Թուրքիան հեղաշրջման եզրին հասցնելու մեջ: ԺՀԿ-ի հայտարարության մեջ նշվում է, որ ԱԶԿ-ն հուլիսի 15-ի հեղաշրջման փորձից հետո հետևությունների անելու փոխարեն  շարունակում է բացառել հասարակական կոնսենսուսը, ինչպես նաև հարձակվել ժողովրդավարական, աշխարհիկ, սոցիալական, իրավական պետության սկզբունքների և Թուրքիայի հանրապետության հիմնական արժեքների վրա:

Ըստ ԺԴԿ-ի հայտարարության՝ Թուրքիայում դատական համակարգը անցել է քաղաքական իշխանության վերահսկողության տակ, իսկ երկրում նախագահական պալատը հեղաշրջում է իրականացնում՝ որպես պատրվակ օգտագործելով FETÖ-ի դեմ պայքարը:

Ստեղծված իրավիճակը թուրք ժողովրդի ազատության և երկրի ապագայի դեմ սպառնալիք որակելով՝ ԺՀԿ-ն հետևյալ պահանջներն է ներկայացնում.

• Րոպե առաջ դադարեցնել «Cumhuriyet» թերթի դեմ FETÖ-ին անդամակցելու մեղադրանքով սկսված ոչ իրավական և անտրամաբանական դատավարությունը:

• Դադարեցնել մամուլի նկատմամբ բոլոր ճնշումները:  Պետք է վերացվեն խղճի, մտքի, արտահայտվելու  և տեղեկատվություն ստանալու ազատության իրացմանը խոչընդոտող բոլոր ճնշումները: Կալանավորված բոլոր լրագրողները պետք է ազատ արձակվեն:

• Կարճ ժամանակում բացահայտել հեղաշրջման փորձը կատարող, աջակցող  ռազմական, քաղաքական գործիչներին ու բյուրոկրատիայի ներկայացուցիչներին և դատել օրենքի շրջանակներում: Մյուս կողմից, պետք է ճանաչել բոլոր քաղաքացիների արդար դատավարության իրավունքը, որոնք Թուրքիայում հայտարարված արտակարգ դրության  ժամանակ ձերբակալվել կամ ազատվել է աշխատանքից:

• ԱԶԿ-ն պատգամավորներին կալանավորելով ծառայություն է մատուցում ահաբեկչությանը: Իրավական գործընթացը դեռ չավարտված պատգամավորներին կալանավորելը հակառակ է սահամանդրությանը: Այս անօրինականությունների պետք է վերջ դրվի:

• Ավտորիտար ռեժիմը, սահմանափակելով քաղաքացիների խոսքի, հավաքների և նախաձեռնություների ազատությունները, ճնշում է հասարակության բոլոր խմբերին: Պետք է անհապաղ վերջ դնել դպրոցների, համալսարանների, թոշակառուների, կանանց, հասարակական կազմակերպությունների, գործարարների և մեր բոլոր քաղաքացիների կյանքի անվտանգության ուղղված սպառնալիքներին, հարձակումներին  և ճնշումներին:

Հիշեցնենք, որ նոյեմբերի սկզբին Թուրքիայում կալանվորվել էին ընդդիմադիր «Cumhuriyet» թերթի խմբագրական և ղեկավար կազմի 9-ը ներկայացուցիչ: Նույն շրջանում թուրքական դատարանի որոշմամբ՝ կալանավորվեցին քրդամետ ԺԴԿ-ի 9 պատագամավոր, որոնց թվում նաև կուսակցության համանախագահներ Սելահաթթին Դեմիրթաշը և Ֆիգեն Յուքսեքդաղը: