Թուրքիայի արտգործնախարարությունը պատասխանել է Լյուքսեմբուրիգին

Միջազգային06:48, 08 Նոյեմբեր 2016

Թուրքիայի արտգործնախարարությունը պատասխանել է Լյուքսեմբուրիգին

Թուրքիայի արտգործնախարարությունը (ԱԳՆ) պատասխանել է նախօրեին Լյուքսեմբուրգի ԱԳ նախարարի հայտարարությանն այն մասին, թե Եվրամիությունը (ԵՄ) կարող է Թուրքիայի նկատմամբ տնտեսական պատժամիջոցներ կիրառել:

Թուրքական «Ensonhaber.com» լրատվակայքի տեղեկացմամբ՝ ԱԳՆ խոսնակ Հյուսեին Մյուֆթուօղլուն այս առթիվ գրավոր հայտարարություն է տարածել: Հայտարարությամբ քննադատվել է Լյուքսեմբուրգի ԱԳ նախարար Ժան Ասելբորնի՝ գերմանական «Deutschlandfunk» ռադիոկայանի հետ հարցազրույցի ժամանակ նախօրեին հնչեցրած զգուշացումը:

«Նման անհաջող հայտարարությունները ցույց են տալիս, թե որքան անկարող է Լյուքսեմբուրգի ԱԳ նախարարը ճիշտ հասկանալ և գնահատել մասշտաբն ու բնույթը այն ահաբեկչության, որի դեմ Թուրքիան ստիպված է պայքարել: Այն դեպքում, երբ վիճելի է անգամ, թե հենց Լյուքսեմբուրգը որքանով է արդյունավետ մասնակցում միջազգային ահաբեկչության դեմ պայքարին: Մինչդեռ մենք ակնկալում էինք, որ նախարար Ասելբորնը ամեն առիթով կդատապարտի 246 կյանք խլած հեղաշրջման փորձի հեղինակ ահաբեկիչներին»:

Մյուֆթուօղլուի կարծիքով՝ Թուրքիայի նման ժողովրդավարական երկրում հուլիսի 15-ից հետո տեղի ունեցող իրադարձությունները ուղղված են միայն ու միայն երկրում ժողովրդավարության ապահովմանն ու մարդու իրավունքների պաշտպանությանը:

Հիշեցնենք, որ նոյեմբերի 7-ին Լյուքսեմբուրգի ԱԳ նախարար Ժան Ասելբորնը հայտարարել էր, որ Թուրքիայում տեղի ունեցող ապօրինի ձերբակալությունների և ընդդիմության ձայնը լռեցնելու փորձերի պատճառով Եվրամիությունը, ի վերջո, ստիպված կլինի Թուրքիայի նկատմամբ տնտեսական պատժամիջոցներ կիրառել: Նախարարը հիշեցրել էր, որ Թուրքիայից արտահանումների 50 տոկոսը ուղղվում է դեպի Եվրոպա, իսկ երկրում կատարվող ներդրումների 60 տոկոսը դարձյալ Եվրոպական միության կողմից է ապահովվում: Հետևաբար, այդ հանգամանքը Անկարայի վրա ճնշում գործադրելու հզոր միջոց կարող է ծառայել:

Աղբյուր` Ermenihaber.am