Զեկույց. «Թուրքիան լռեցնում է անկախ մամուլը»

Իրավական09:46, 15 Դեկտեմբեր 2016

Զեկույց. «Թուրքիան լռեցնում է անկախ մամուլը»

«Human Rights Watch» (HRW) միջազգային իրավապաշտպան կազմակերպությունը Թուրքիայի վերաբերյալ զեկույց է հրապարակել: Ինչպես տեղեկացնում է թուրքական «Birgun.net» լրատվակայքը՝ զեկույցում անդրադարձ է կատարվել մասնավորապես մամուլի դեմ կիրառվող բռնություններին:

HRW-ն արձանագրել է, որ Թուրքիայի իշխանությունները լռեցնում են անկախ մամուլը՝ հուլիսի 15-ի հեղաշրջման փորձից հետո երկրում սկիզբ առած մասսայական ձերբակալությունների դեմ ուղղված քննադատությունները կանխելու նպատակով:

Զեկույցում նշվում է, որ Թուրքիայում սաստկանում են ճնշումները քննադատական մոտեցում դրսևորող մամուլի ներկայացուցիչների դեմ և այդ վիճակը 2014թ. ի վեր գնալով ավելի ու ավելի է վատթարանում:

Հուլիսի 15-ից հետո Թուրքիայում, ընդհանուր առմամբ, դադարեցվել է 140 մեդիա կառույցի գործունեություն, փակվել է 29 տպագրատուն, աշխատանքից զրկվել է 2.500 լրագրող:

«Human Rights Watch»-ը նաև ուշադրություն է հրավիրել այն հանգամանքի վրա, որ լրագրողները Թուրքիայում ենթարկվում են նաև ֆիզիկական բռնությունների: