Թուրքական լիրայի ռեկորդային արժեզրկումը շարունակվում է

Տնտեսական07:53, 11 Հունվար 2017

Թուրքական լիրայի ռեկորդային արժեզրկումը շարունակվում է

Թուրքական լիրան շարունակում է աննախադեպ տեմպերով արժեզրկվել դոլարի և եվրոյի նկատմամբ: Երեկ երեկոյան 1 դոլարի փոխարժեքը հասել է ռեկորդային ցուցանիշի՝ 3.8 լիրայի, իսկ եվրոն էլ անցել է պատմության մեջ չգրանցված 4 լիրայի շեմը: Երեկ Թուրքիայի կենտրոնական բանկի ձեռնարկած միջոցառումների շնորհիվ հնարավոր է եղել կարճ ժամանակով կանգնեցնել լիրայի արժեզրկումը, սակայն այսօր առավոտ դոլարը կրկին անցել է 3.8 լիրայի շեմը` հասնելով 3.89 լիրայի: Եվրոն այս պահին հավասար է 4.049 լիրայի:

JCR միջազգային վարկանիշային գործակալության Եվրասիական ներկայացուցչության տնօրեն Օրհան Օքմենը, թուրքական «T24» լրատվական կայքի հետ զրույցում նշել է, որ լիրայի արժեզրկումը կապված է ինչպես ներքին , այնպես էլ արտաքին գործոններով:

Օքմենը որպես արտաքին պատճառ նշել է միջազգային շուկայում դոլարի արժևորումը, ինչը կապված է վերջին շրջանում կապիտալի` դեպի զարգացած երկրներ ունեցած հոսքի հետ:

Ներքին պատճառներից Օքմենը թվարկել է կենտրոնական բանկի քաղաքականությունը, երկրում կառավարման կարգի փոփոխության նախաձեռնումն ու դրա հետևանքով քաղաքական դաշտում տիրող անորոշությունը:

Ըստ թուրք մասնագետի` լիրայի արժեզրկման մեկ այլ կարևոր պատճառ է օրեր առաջ ընդունված որոշմամբ երկրում արտակարգ դրություն երկարաձգումը, ինչը մեծ լարվածություն է ստեղծում տնտեսական միջավայրում:

Աղբյուր` Ermenihaber.am