Համաշխարհային բանկը նվազեցրել է Թուրքիայի տնտեսական աճի կանխատեսումը

Տնտեսական08:41, 11 Հունվար 2017

Համաշխարհային բանկը նվազեցրել է Թուրքիայի տնտեսական աճի կանխատեսումը

Համաշխարհային բանկը (ՀԲ) հրապարակել է «Գլոբալ տնտեսական հեռանկարներ-2017թ.» (GEP) խորագրով իր հունվարյան զեկույցը: Թուրքական «Bloomberght.com» կայքի տեղեկացմամբ՝ ՀԲ-ն վերանայել է 2017-18թթ Թուրքիայի տնտեսական աճի վերաբերյալ իր կանխատեսումները:

Հունվարյան զեկույցում կանխատեսվել է, որ Թուրքիան 2017թ. կունենա 3 տոկոս, 2018թ.՝ 3.5 տոկոս և 2019թ.՝ 3.7 տոկոս տնտեսական աճ: Նշենք, որ ըստ Համաշխարհային բանկի, Թուրքիայի համար տնտեսապես ծանր 2016թ. այս երկրի տնտեսական աճը կազմել է 2.5 տոկոս:

Նշենք նաև, որ 2016թ. հունիսին հրապարակված նախորդ GEP զեկույցում Թուրքիայի վերաբերյալ ակնկալիքներն ավելի լավատեսական էին: Համաշխարհային բանկը այդ ժամանակ 2016թ. և 2017թ. համար կանխատեսել էր 3.5, իսկ 2018թ. համար 3.6 տոկոս տնտեսական աճ:

«Թուրքիայի տնտեսական ակտիվությունը 2009թ. հետո առաջին անգամ անկում ապրեց 2016թ երրորդ քառորդում՝ ձախողված հեղաշրջման փորձի պատճառով վատթարացած առևտրական պայմանների պատճառով:

Ամենայն հաանականությամբ, ձախողված հեղաշրջման փորձից հետո անկումը կընթանա փուլ առ փուլ, հեռանկարները շատ անորոշ են և առկա են հետագա անկման ռիսկեր: Եթե աշխարքաղաքական և ազգամիջյան լարվածության պատճառով բարեփոխումների իրագործումը հետաձգվի և ներդրումները չեղարկվեն, դա բացասաբար կազդի երկարաժամկետ զարգացման հեռանկարների վրա», -ասված է զեկույցում: