Էրդողանն անդրադարձել է մեջլիսում տեղի ունեցած ծեծկռտուքին

Տարածաշրջան13:48, 12 Հունվար 2017

Էրդողանն անդրադարձել է մեջլիսում տեղի ունեցած ծեծկռտուքին

Թուրքիայի նախագահ Ռեջեփ Թայիփ Էրդողանը անդրադարձել է երեկ սահմանադրական փոփոխությունների քննարկման ժամանակ իշխող «Արդարություն և զարգացում» (AKP-ԱԶԿ) և գլխավոր ընդդիմադիր «Ժողովրդահանրապետական կուսակցության» (ԺՀԿ-CHP) պատգամավորների միջև տեղի ունեցած ծեծկռտուքին: Էրդողանն ընդդիմադիրներին մեղադրել է խորհրդարանի աշխատանքները խոչընդոտելու քննարկման գործընթացը դանդաղեցնելու մեջ` նշելով, որ ընդդիմադիրները այդպիսով ոչ մի արդյունքի չեն հասնելու:

Ըստ թուրքական «Doğan» լրատվական գործակալության`Թուրքիայի նախագահը մասնավորապես ասել է. «Ինչ ուզում եք արեք, միևնույնն է ես վստահ եմ, որ եթե ոչ 15 օր, ապա 1 ամիս հետո դա (սահմանադրական փոփոխությունների նախագիծը-խմբ.) խորհրդարանից դուրս է գալու ու հանձնվելու է ժողովրդի դատին»:

Էրդողանը քեմալականներին (ԺՀԿ) խորհուրդ է տվել չխոչընդոտել սահմանադրական փոփոխությունների քննարկման գործընթացին և հնարավորություն տալ, որ խորհրդարանը նախագիծը հանրաքվեի դնելու որոշում կայացնի` խոստանալով ընդունել ժողովրդի որոշումը:

Հիշեցնենք, որ նախօրեին Թուրքիայի խորհրդարանում սահմանադրական փոփոխությունների հոդվածների քննարկման ժամանակ լարվածություն է առաջացել ընդդիմադիր «Ժողովրդահանրապետական կուսակցության» և իշխանական «Արդարություն և զարգացում կուսակցության» պատգամավորների միջև, ինչը րոպեների ընթացքում վերածվել է զանգվածային ծեծկռտուքի:

Միջադեպի ժամանակ կոտրվել է ԱԶԿ-ի պատգամավոր, կուսակցության փոխնախագահ Ֆաթիհ Շահինի քիթը, որոշ պատգամավորներ էլ ստացել են թեթև վնասվածքներ:

Ծեծկռտուքի ժամանակ վնասվել է նաև խորհրդարանի ամբիոնը:

Աղբյուր` Ermenihaber.am