Թուրքիայում գրանցվել է 2010-ից ի վեր գործազրկության ամենաբարձր ցուցանիշը

Տնտեսական08:32, 15 Փետրվար 2017

Թուրքիայում գրանցվել է 2010-ից ի վեր գործազրկության ամենաբարձր ցուցանիշը

Թուրքիայում վերջին շրջանում նկատվող գործազրկության աճի միտումը շարունակվում է: Ըստ Թուրքիայի վիճակագրական ծառայության` 2016-ի նոյեմբերի համար հրապարակած տվյալների` նախորդ տարվա (2015) նույն ժամանակահատվածի համեմատ գործազրկության մակարդակը բարձրացել է 1.6%-ով` հասնելով 12.1%-ի: Համապատասխանաբար գործազուրկների թիվն էլ ավելացել է 590.000-ով` հասնելով 3.715.000-ի:

Ընդ որում, երիտասարդ բնակչության (15-24 տարեկան) շրջանում գործազրկությունը աճել է 3.5 %-ով՝ հասնելով 22.6%-ի, իսկ 15-64 տարեկանների շրջանում ավելացել է 1.2%-ով `հասնելով 12.3%-ի:

Ըստ թուրքական «Demokrathaber.org» լրատվական կայքի` սա 2010-ի մարտից ի վեր գրանցված գործազրկության ամենաբարձր ցուցանիշն է:

Գյուղատնտեսական ոլորտում աշխատողների թիվը նվազել է 101.000-ով, իսկ ոչ գյուղատնտեսական ոլորտներում` ավելացել 491.000-ով: Ընդհանուր աշխատուժը նախորդ տարվա նույն ժամանակահատվածի համեմատությամբ ավելացել է 980.000-ով` տոկոսային հարաբերությամբ աճելով 0.9-ով:

0.7%-ով էլ ավելացել է չգրանցված աշխատողների քանակը` հասնելով 33.3%-ի:

Աղբյուր` Ermenihaber.am