Թուրքիայի վարչապետը հայտարարել է «Եփրատի վահան» ռազմագործողության ավարտի մասին

Տարածաշրջան09:24, 30 Մարտ 2017

Թուրքիայի վարչապետը հայտարարել է «Եփրատի վահան» ռազմագործողության ավարտի մասին

Թուրքիայի վարչապետ Բինալի Յըլդըրըմը հայտարարել է, որ «Սիրիայի Ազատ բանակ» խմբավորման կողմից Էլ Բաբ քաղաքի գրավումով և այնտեղ վերջինիս ուժերի տեղակայումքվ ավարտվել է իրենց կողմից Սիրիայում իրականացվող «Եփրատի վահան» ռազմագործողությունը: Այդ մասին ըստ թուրքական «Internethaber» լրատվամիջոցի` նա հայտարարել է թուրքական « NTV » և « Star TV» հեռուստալիքներին տված հարցազրույցում:

Թուրքիայի վարչապետի խոսքերով, եթե Սիրիայի տարածքում այլ գործողություն սկսվի այն կկրի արդեն այլ անվանում:

«Եփրատի վահան գործողությունն իրականացվել էր 2015 քառ. կմ տարածքի անվտանգությունն ապահովելու համար: Էլ Բաբի գրավումով դա ապահովվեց: Այնտեղ տեղակայվեց Սիրիայի Ազատ բանակը: Սիրիացիները նորից այդ տարածք վերադարձան: Կյանքը վերադարձավ իր հուն, ամեն ինչ վերահսկողության տակ վերցվեց»,- ասել է Յըլդըրըմը:

Նա նաև ընդգծել է, որ, եթե «Իսլամական պետություն» (ԻՊ) ահաբեկչական կազմակերպությունը կրկին սպառնալիք ստեղծի Թուրքիայի անվտանգության համար, ապա իրենք նոր գործողություն կիրականացնեն:

Հիշեցնենք, որ սիրիական սահմանային Ջերաբլուս քաղաքաը ԻՊ ահաբեկիչներից մաքրելուն ուղղված օպերացիայի շրջանակներում օգոստոսի 24-ի վաղ առավոտյան կոալիցիոն ուժերի աջակցությամբ Թուրքիայի զինված ուժերի լայնամասշտաբ գործողություններ սկսեցին: Ահաբեկիչնեի դեմ հիմնական ցամաքային գործողություններն իրականացնում են «Սիրիայի ազատ բանակ» կոչվող զինված ընդդիմության մարտիկները՝ Թուրքիայի մի քանի հարյուր հատուկջոկատայինների և հրետանային ստորաբաժանումների մասնակցությամբ: Ջերաբլուսի վերահսկողությունն արդեն իրենց ձեռքը վերցրած սիրիական զինված ընդդիմությունը Թուրքիայի համակողմանի աջակցությամբ ցանկանում է շարժվել դեպի Մանբիջ քաղաք, որը Սիրիայի քրդերը վերջին շրջանում կարողացել էին գրավել ԻՊ զինյալներից:

Աղբյուր` Ermenihaber.am