Թուրքիայում ընդդիմադիրները դիմել են ՄԻԵԴ՝ բողոքարկելով հանրաքվեի արդյունքները

Իրավական09:51, 28 Ապրիլ 2017

Թուրքիայում ընդդիմադիրները դիմել են ՄԻԵԴ՝ բողոքարկելով հանրաքվեի արդյունքները

Թուրքիայի ընդդիմադիր «Ժողովրդահանրապետական կուսակցությունը» (ԺՀԿ-CHP) պաշտոնապես դիմել է Մարդու իրավունքների եվրոպական դատարան (ՄԻԵԴ)` բողոքարկելով ապրիլի 16-ին երկրում կայացած սահմանադրական հանրաքվեի արդյունքները:

«ԺՀԿ»-ն նեկայացնող պատգամավոր Մուսա Չամը հայտնել է, որ ՄԻԵԴ-ին ներկայացված դիմումի մեջ ամփոփվել են սահմանադրական հանրաքվեի ընթացքում և դրան հաջորդող ժամանակաշրջանում տեղի ունեցած միջադեպերը, քվեարկության արդյունքները: Մասնավորապես, նշվում է, որ հանրաքվեի ընթացքում բոլոր հանրային աղբյուրները անձամբ հսկվել են նախագահի կողմից և ուղղորդվել ՝ «կողմ» քվեներ ապահովվելու համար:

Ըստ թուրքական «Սոնդաքիքա» լրատվական կայքի՝ դիմումում նշվում է, որ «դեմ» քվեարկողները ներկայացվում որպես «ահաբեկիչներ» կամ մեղադրվում են ահաբեկչական կազմակերպությանը անդամակցելու մեջ։

Բացի այդ հանրաքվեն անցկացվել է հուլիսի 15-ին հեղաշրջման փորձից հետո հայտարարված արտակարգ դրության շրջանակներում, երբ սահմանափակված են մի շարք օրենքներ, իրավունքներ և ազատություններ։

Աղբյուրը նշում է, որ ընդդիմադիրների պնդմամբ կենտրոնական հանձնաժողովի կողմից առանց կնիք քվեաթերթիկները վավեր ճանաչելու պատճառով, չի կարելի համարել, որ հանրաքվեի արդյունքները արտահայտում են ժողովրդի կամքը:

Աղբյուր` Ermenihaber.am