Իրաքը դադարեցրել է Թուրքիայից լոլիկի ներկրումը

Տնտեսական10:10, 22 Մայիս 2017

Իրաքը դադարեցրել է Թուրքիայից լոլիկի ներկրումը

Իրաքը մայիսի 21-ից դադարեցրել է արտերկրից, այդ թվում նաև՝ Թուրքիայից լոլիկի ներկրումը: Այս մասին տեղեկացնում է թուրքական «Ekonomi.haber.com» լրատվակայքը՝ հիշեցնելով, որ Թուրքիան դեռ լիովին չի կարգավորել ապրանքների արտահանման ոլորտում Ռուսաստանի հետ ունեցած խնդիրները: Աղբյուրի հավաստմամբ՝ այս որոշումը բացասաբար կազդի թուրքական շուկայի վրա:

Իրաքի գյուղատնտեսության նախարարությունը հանդես է եկել թեմայի վերաբերյալ հայտարարությամբ՝ ընդգծելով, որ տեղական արտադրանքի, մասնավորապես Նեջեֆ և Քերբելա նահանգներում բերքի առատության շնորհիվ ներքին շուկայում լոլիկի պահանջարկը կարող է բավարարվել նաև առանց ներկրումների: Այս քայլով Իրաքը նաև փորձում է աջակցություն ցուցաբերել տեղական արտադրողներին:

Իրաքի նախարարության այս հայտարարությունը հրապարակվել է նաև Թուրքիայի էկոնոմիկայի նախարարության պաշտոնական կայքում:

Նշենք, որ Ռուսաստանի հետ առևտրաշրջանառության արգելքների պատճառով անցյալ տարի Թուրքիայից լոլիկի արտահանման ծավալները կտրուկ նվազել էին՝ 367 մլն դոլարից հասնելով 238 մլն-ի: 2016թ. միայն Իրաք արտահանված լոլիկի ծավալները կազմել են 88 մլն դոլար: 2015թ. այդ ցուցանիշը կազմել էր 82.8 մլն , իսկ 2014թ.՝ 98.5 մլն դոլար:

Աղբյուր` Ermenihaber.am