2017թ. Թուրքիայում օտարերկրյա ուղղակի ներդրումների նկատելի աճ է գրանցվել

Տնտեսական11:28, 26 Հուլիս 2017

2017թ. Թուրքիայում օտարերկրյա ուղղակի ներդրումների նկատելի աճ է գրանցվել

2017թ. հունվար-մայիս ամիսներին Թուրքիայում կատարված միջազգային ուղղակի ներդրումների ընդհանուր ծավալը ավելացել է 11.2 տոկոսով՝ կազմելով 4 մլրդ 777 մլն դոլար: Թուրքիայի էկոնոմիկայի նախարարության տվյալների համաձայն՝ վերջին շրջանում Թուրքիայի նկատմամբ հատկապես մեծացել է Պարսից ծոցի, Մերձավոր և Միջին Արևելքի երկրների հետաքրքրությունը:

Թուրքական «Sabah» թերթի կայքի տեղեկացմամբ՝ նշված ժամանակահատվածում Ծոցի երկրներից Թուրքիայում կատարվող անմիջական ներդրումները նախորդ տարվա նույն շրջանի համեմատ աճել են 397 տոկոսով: Այդ ներդրումների ծավալը 2017թ. առաջին 5 ամիսնների ընթացքում կազմել է 552 մլն դոլար՝ նախորդ տարվա 111 մլն դոլարի փոխարեն:

Ասիական երկրներից Թուրքիայում կատարված ուղղակի ներդրումների ծավալը 2017թ. հունվար-մայիս ամիսներին աճել է 122 տոկոսով՝ 422 մլն դոլարից հասնելով 936 մլն դոլարի: Իսկ միայն Մերձավոր և Միջին Արևելքի երկրներից կատարվող ներդրումները աճել են 189 տոկոսով՝ 285 մլն դոլարից հասնելով 824 մլն դոլարի:

Եվրամիության անդամ երկրներից կատարված ներդրումները ավելացել են 66.3 տոկոսով՝ կազմելով 2.5 մլրդ դոլար՝ նախորդ տարի գրանցված 1.5 մլրդ դոլարի փոխարեն: Ընդ որում՝ Գերմանիայից Թուրքիայում կատարվել է 142 մլն դոլար, Նիդերլանդներից՝ 751 մլն դոլար, Անգլիայից՝ 74 մլն դոլար, Ավստրիայից՝ 116 մլն դոլար ընդհանուր արժողությամբ ներդրում:

Աղբյուր` Ermenihaber.am