Թուրքիան և Կանադան կարող են համագործակցել ավիաարդյունաբերությունում

Տնտեսական07:20, 12 Հոկտեմբեր 2017

Թուրքիան և Կանադան կարող են համագործակցել ավիաարդյունաբերությունում

Թուրքիան կարող է ավիաարդյունաբերության ոլորտում համագործակցություն սկսել ինքնաթիռներ արտադրող կանադական «Bombardier» ընկերության հետ։ Այս մասին տեղեկացրել է Թուրքիայի Արտաքին տնտեսական հարաբերությունների կազմակերպության (DEİK) թուրք-կանադական աշխատանքային խորհրդի նախագահ Օսման Օքյայը։

Թուրքական պետական «Anadolu» լրատվական գործակալության փոխանցմամբ՝ Օքյայը նշել է, որ Թուրքիայում ներդրումներ կատարած կանադացիները շատ գոհ են իրենց բիզնեսներից և ցանկանում են ընդլայնել համագործակցությունը։ Նա հավելել է, որ Կանադայից ամենամեծ ներդրումները Թուրքիայում կատարվում են հանքարդյունաբերության ոլորտում։

«Կանադայում գործում է քաղաքացիական ինքնաթիռներ արտադրող «Bombardier» ընկերությունը։ Մենք կարող ենք համագործակցել նրանց հետ։ Համագործակցել ոչ թե առևտրի տեսանկյունից, այլ համատեղ արտադրություն սկսելու: Հնարավոր է համագործակցություն նաև տիեզերական և միջուկային արդյունաբերության ոլորտում։ Համատեղ կարող ենք համագործակցել նաև երրորդ երկրների հետ։ Մենք այլ երկրների հետ նման համագործակցության փորձ ունենք», - ասել է Օքյայը։

Նա հավելել է, որ Կանադայի հետ հնարավոր է նաև կրթական ոլորտում համագործակցություն՝ խորհրդատվության, փորձի փոխանակման տեսքով։ Օքյայը նշել է, որ Կանադայից դեպի Թուրքիա ներմուծումը այնքան էլ մեծ չէ, սակայն երկու երկրների միջև գոյություն ունեն ազատ առևտրի պայմանագրեր, որոնք մեծապես նպաստում են երկկողմ հարաբերություննների ակտիվացմանը։

Աղբյուր` Ermenihaber.am