Չավուշօղլու. «S-400-ների առաջին մարտկոցները մեզ կմատակարարվեն 2019-ի վերջին»

Ռազմական11:02, 11 Հուլիս 2018

Չավուշօղլու. «S-400-ների առաջին մարտկոցները մեզ կմատակարարվեն 2019-ի վերջին»

ՆԱՏՕ-ի գագաթնաժողովին մասնակցելու նպատակով Բրյուսել մեկնած Թուրքիայի արտգործնախարար Մևլութ Չավուշօղլուն լրագրողների հետ զրույցում խոսել է ռուսական հակաօդային պաշտպանության «S-400» զենիթահրթիռային համակարգերի մասին։

Թուրքիան և Ռուսաստանն արդեն պայմանագիր են ստորագրել այդ համակարգերի գնման վերաբերյալ։

Չավուշօղլուն պնդել է, որ թեև առկա է ՆԱՏՕ-ի մի շարք անդամ երկրների դժգոհությունը, բայց Թուրքիան գնելու է այդ համակարգերը Ռուսաստանից։ Թուրքիան ինքնիշխան պետություն է և ինքնուրույն որոշումներ կայացնելու իրավունք ունի։

«Մենք ունեիք այդ համակարգերի կարիքը։ Նմանատիպ համակարգեր մենք չկարողացանք ձեռք բերել մեր դաշնակիցներից։ Այդ իսկ պատճառով Ռուսաստանի հետ պայմանավորվածության եկանք։ Ամենալավ առաջարկը մեզ արեց Ռուսաստանը, S-400-ների առաջին մարտկոցները մեզ կմտակարարվեն 2019-ի տարեվերջին»։

Պատասխանելով այն հարցին, թե արդյոք S-400-ների առքը նշանակում է, որ Թուրքիան կհեռանա ՆԱՏՕ-ից, թուրք նախարարն ասել է.

«Իհարկե ոչ, Թուրքիան ՆԱՏՕ-ից չի հեռանում։ Եթե ՆԱՏՕ-ի մեր դաշնակիցներն ընդհառաջ գնային մեր կարիքներին, մենք նրանցից կգնեինք այդպիսի համակարգեր և առաջնահերթությունը հենց նրանց կտայինք»,-եզրափակել է Չավուշօղլուն։

Աղբյուր` Türkiye Gazetesi