Թուրքիայում կայացել է Բարձրագույն զինվորական խորհրդի նիստը

Տարածաշրջան05:58, 03 Օգոստոս 2018

Թուրքիայում կայացել է Բարձրագույն զինվորական խորհրդի նիստը

Օգոստոսի 2-ին Թուրքիայում տեղի է ունեցել Բարձրագույն զինվորական խորհրդի նիստը (YAŞ)։ Վերջինս ղեկավարել է Թուրքիայի նախագահ Ռեջեփ Թայիփ Էրդողանը։ Նախագահական պալատում տեղի ունեցած նիստը տևել է 2.5 ժամ։

Դրա ավարտից հետո հրապարակվել է հայտարարություն, որով հայտնի է դարձել, որ Էրդողանը բարձրացրել է մի շարք զինվորականների կոչումները, ինչպես նաև երկարաձգել է որոշ գեներալների պաշտոնավարման ժամկետները։

Մասնավորապես 1 տարով երկարաձգվել է 13 գեներալի, 2 տարով էլ երկարաձգվել է 383 գնդապետի պաշտոնավարման ժամկետները։

Անդրադառնալով որոշ զինվորականների կոչումը բարձրացնելուն, նշենք, որ Էրդողանի որոշմամբ՝ ռազմածովային ուժերի հրամանատար, գեներալ լեյտենանտ Ադնան Օզբալ ստացել է բանակի ծովակալի կոչում։

Ցամաքային ուժերի 2-րդ բանակի հրամանատար, գեներալ լեյտենանտ Իսմայիլ Մեթին Թեմելին շնորհվել է բանակի գեներալի կոչում։ Բարձրացվել են ևս մի քանի գեներալների կոչումներ։ 41 գնդապետին էլ շնորհվել է գեներալի կոչում։

Որոշ գեներալներ և ծովակալներ էլ ավարտել են իրենց ծառայությունը զինված ուժերում և անցել թոշակի։

Նիստի առանձնահատկությունը կայանում էր նրանում, որ այն առաջին անգամ կազմակերպվեց նախագահական կառավարման համակարգի պայմաններում։

Աղբյուր` Haberler