Ազգային արժույթի արժեզրկման դեմ Թուրքիան քայլեր է ձեռնարկում

Տնտեսական11:09, 14 Օգոստոս 2018

Ազգային արժույթի արժեզրկման դեմ Թուրքիան քայլեր է ձեռնարկում

Թուրք պաշտոնյաների հայտարարություններից և Թուրքիայի կենտրոնական բանկի միջամտությունից հետո թուրքական ազգային արժույթի փոխարժեքը որոշակի առաջընթաց է գրանցել՝ 1 դոլարի դիմաց կազմելով 6.52 լիրա:

Ըստ թուրքական մամուլի՝ Կենտրոնական բանկն այս պահի դրությամբ 10 մլրդ լիրային և ընդհանուր առմամբ 9 մլրդ դոլարին համարժեք ոսկի է դրել շրջանառության մեջ: Ֆինանսական կայունությունն ապահովելու նպատակով Կենտրոնական բանկը նաև 10 կետից բաղկացած կանխարգելիչ միջոցառումների փաթեթ է կազմել:

Թուրքիայի նախագահի մամուլի խոսնակ Իբրահիմ Քալընը տնտեսական զարգացումների առնչությամբ իր թվիթերյան էջում գրել է.«Գանձապետարանի և ֆինանսների նախարարությունը, Կենտրոնական բանկը և այլ կառույցներ ֆինանսական կայունությանը միտված անհրաժեշտ քայլեր են ձեռնարկում: Թուրքական տնտեսության հիմքն ամուր է: Ոչ ոք սպեկուլյատիվ լրատվությանը թող ուշադրություն չդարձնի: Թուրքիան ուժ է գտնելու այս գործընթացը հաղթահարելու համար»:

Իսկ Էրդողանի փեսան՝ Թուրքիայի գանձապետարանի և ֆինանսների նախարար Բերաթ Ալբայրաքը, պատրաստվում է հեռուստակամրջի միջոցով միջազգային համաժողով իրականացնել ներդրողների հետ: Նախարարության աղբյուրների տեղեկատվության համաձայն՝ համաժողովին մասնակցելու են հարյուրավոր ներդրողներ ԱՄՆ-ից, Եվրոպայից և Մերձավոր Արևելքից: