Թուրքիայի օդուժը սկսել է պարեկային ծառայություն իրականացնել Քանդիլում

Տարածաշրջան12:13, 23 Օգոստոս 2018

Թուրքիայի օդուժը սկսել է պարեկային ծառայություն իրականացնել Քանդիլում

Թուրքիայի օդուժը հերթական անգամ հրթիռակոծել է Հյուսիսային Իրաքի Քանդիլի շրջանը, որտեղ գտնվում է «Քուրդիստանի բանվորական կուսակցության» (ՔԲԿ-PKK) գլխավոր ռազմաբազան։ Ոչնչացվել են քուրդ զինյալների թաքստոցներ։

Ռազմական գործողության ընթացքում օգտագործվել են «F-16» տիպի կործանիչներ, անօդաչու թռչող սարքեր (ԱԹՍ)։

Թուրքիայի օդուժի 2 ռազմական ուղղաթիռ էլ Քանդիլի լեռներում սկսել են պարեկային ծառայություն իրականացնել։

Հիշեցվում է նաև, որ ավելի վաղ Հյուսիսային Իրաք մտած Թուրքիայի ցամաքային ուժերի որոշ ստորաբաժանումներ այժմ հասել են Սիդեքան շրջան, որը բավական մոտ է Քանդիլին։

PKK-ն Թուրքիայում համարվում է ահաբեկչական կազմակերպություն։

Հիշեցնենք, որ Թուրքիայում կայացած արտահերթ ընտրություններից առաջ՝ նախըտրական քարոզարշավի ընթացքում, Թուրքիայի իշխող կուսակցության անդամները հայտնել էին, որ թուրքական ստորաբաժանումներն արդեն մտել են Հյուսիսային Իրաք։

Աղբյուր` Hurriyet