Թուրք-ռուսական հարաբերություններին նվիրված համաժողովում դիտարկվել է նաև քրդական գործոնը

Տարածաշրջան12:41, 24 Հոկտեմբեր 2018

Թուրք-ռուսական հարաբերություններին նվիրված համաժողովում դիտարկվել է նաև քրդական գործոնը

Ռուսաստանի արտաքին հարաբերությունների հանձնաժողովի նախաձեռնությամբ կազմակերպված «Ռուսաստանը և Թուրքիան. բազմավեկտոր համագործակցության ռազմավարական ոլորտները» խորագրով համաժողովի ընթացքում անդրադարձ է կատարվել նաև երկկողմ հարաբերությունների վրա քրդական գործոնի ազդեցությանը:

Համաժողովին ելույթ է ունեցել Ռուսաստանի գիտությունների ակադեմիայի Արևելագիտության ինստիտուտի տնօրեն Վիտալի Նաումկինը: Ըստ նրա՝ Մոսկվա-Անկարա հարաբերություններում խնդրահարույց հարցերից մեկը համարվող քրդական գործոնի ազդեցությունը նվազել է:

Նաումկինը շեշտել է, որ ռուսական կողմը բազմիցս մերժել է զենք տրամադրելու վերաբերյալ քրդական կողմի պահանջները: Ի հակադրություն Ռուսաստանի, ըստ Նաումկինի, ԱՄՆ-ն ակտիվ աջակցություն է ցուցաբերում քրդական խմբավորումներին և Սիրիայի հյուսիսում քրդական պետություն ստեղծելու գաղափարին:

Բանախոսի կարծիքով ռուս-թուրքական շահերի որոշակի համընկնումն էլ ըստ էության հանգեցնում է նրան, որ քրդական գործոնի բացասական ազդեցությունը երկկողմ հարաբերությունների տեսանկյունից գնալով թուլանում է: