Չավուշօղլուն՝ Կատարում թուրքական ռազմաբազան փակելու պահանջի վերաբերյալ. «Դա անիրականանալի է»

Տարածաշրջան08:45, 31 Հոկտեմբեր 2018

Չավուշօղլուն՝ Կատարում թուրքական ռազմաբազան փակելու պահանջի վերաբերյալ. «Դա անիրականանալի է»

Թուրքիայի արտգործնախարար Մևլութ Չավուշօղլուն մերժել է Սաուդյան Արաբիայի և Պարսից ծոցի մի շարք այլ երկրների պահանջը՝ Կատարում թուրքական ռազմաբազան փակելու մասին։ Այս մասին գրել է Կատարի կառավարությանը մոտ գտնվող «Al-Watan ve Qatar Tribune» թերթը։
Ըստ թերթի՝ Չավուշօղլուն, մեկնաբանելով Սաուդյան Արաբիայի, Եգիպտոսի, Բահրեյնի, Արաբական Միացյալ Էմիրությունների պահանջը, ասել է. «Կարծում ենք, որ այդ պահանջը անիրականանալի է»։

Հիշեցնենք, որ 2017 հունիսի 5-ին Սաուդյան Արաբիայի գլխավորությամբ մի շարք արաբական երկրներ և Մալդիվները հայտարարեցին Կատարի հետ հարաբերությունները խզելու մասին: Իսկ Կատարի հետ ցամաքային սահման ունեցող միակ երկիրը հանդիսացող Սաուդյան Արաբիան դադարեցրեց ցամաքային և օդային հաղորդակցությունը Կատարի հետ:

Դրանից 2 օր անց Թուրքիայի կառավարության առաջարկով հունիսի 7-ին մեջլիսի լիագումար նիստում արտահերթ կարգով քննարկման դրվեց և հաստատվեց 2 երկրների միջև ավելի վաղ կնքված համաձայնագրով Կատարի տարածքում թուրքական զինված ուժերի ստորաբաժանումներ տեղակայելու նախագիծը:

Աղբյուր` Haber Sol