Թուրք նախարար. «ԱՄՆ-ն թուրք նախարարի և ահաբեկչի միջև տարբերություն չի դնում»

Տարածաշրջան12:35, 12 Նոյեմբեր 2018

Թուրք նախարար. «ԱՄՆ-ն թուրք նախարարի և ահաբեկչի միջև տարբերություն չի դնում»

Թուրքիայի ներքին գործերի նախարար Սուլեյման Սոյլուն թուրքական համալսարաններից մեկում ունեցած ելույթի ժամանակ խոսել է Սիրիայի քրդական զինված խմբավորումների հարցում թուրք-ամերիկյան հակասությունների մասին:

Սոյլուն մեկնաբանել է ԱՄՆ-ի պետքարտուղարության այն հայտարարությանը, որով գլխագին է խոստացվել նրանց, ովքեր ամերիկյան կողմին տեղեկություններ կտրամադրեն Թուրքիայում ահաբեկչական համարվող «Քուրդիստանի բանվորական կուսակցության» (ՔԲԿ-PKK) 3 պարագլուխների գտնվելու մասին։

Այս կոնտեքստում թուրք պաշտոնյան հիշեցնելով Սիրիայում ԱՄՆ-ի հատուկ ներկայացուցիչ Ջեյմս Ջեֆֆրին հայտարարությանը, ըստ որի՝ Վաշինգտոնը Սիրիայի քուրդ զինյալներին ահաբեկիչ չի համարում, ասել է։

«Նրանք կարծում են, թե 3 ահաբեկչի ներառելով ահաբեկիչների ցուցակի մեջ, կշահեն մեր ազգի սիրտը։ Երկու թուրք նախարարների հանում են ցուցակից և նրանց փոխարեն 3 ահաբեկչի ավելացնում: ԱՄՆ-ն դրանով մեզ ցանկանում է ասել, որ թուրք նախարարի և ահաբեկչի միջև տարբերություն չի դնում»:

Թուրքիան PKK-ին և YPG-ին նույնացնում է և նրանց համարում ահաբեկչական կազմակերպություններ։

Թուրք պաշտոնյան առիթը բաց չի թողել ԱՄՆ-ին մեղադրելու Սիրիայի քրդական ուժերի հետ համագործակցելու մեջ։ Սոյլուի խոսքերով՝ PKK-ի 3 պարագլուխներին ահաբեկիչների ցուցակում ներառելը և միաժամանակ Սիրիայի քրդական ուժերի հետ համագործակցելը, ԱՄՆ-ի կողմից «երկերեսանիության» դրսևսորում է։

Հիշեցնենք, որ Սոյլուն այն թուրք նախարարներից էր, ում նկատմամբ ԱՄՆ-ն լարված թուրք-ամերիկյան հարաբերությունների պատճառով պատժամիջոց կիրառեց։ Նրա մուտքը ԱՄՆ-ը արգելվել էր, իսկ այդ երկրում գտնվող ֆինանսական միջոցները սառեցվել:

Աղբյուր` Sozcu