«Չենք կարող լուռ մնալ». Էրդողանը՝ ԱՄՆ-ի ու Սիրիայի քրդերի համագործակցության մասին

Տարածաշրջան13:27, 27 Նոյեմբեր 2018

«Չենք կարող լուռ մնալ». Էրդողանը՝ ԱՄՆ-ի ու Սիրիայի քրդերի համագործակցության մասին

Թուրքիայի նախագահ Ռեջեփ Թայիփ Էրդողանն իշխող «Արդարություն և զարգացում» (ԱԶԿ-AKP) կուսակցության ժողովի ժամանակ անդրադարձել է Սիրիայի քրդական ուժերի վերահսկողության տակ գտնվող տարածքներում դիտակետեր տեղակայելու ամերիկյան նախաձեռնությանը։

Էրդողանը քննադատել է ԱՄՆ-ին, որ վերջինս Սիրիայի քուրդ զինյալներին (YPG) չի համարում ահաբեկիչներ:

«Մեր երկիրը գտնվում է YPG-ի թիրախում, որը «Քուրդիստանի բանվորական կուսակցության (ՔԲԿ-PKK) սիրիական թևն է։ Մենք չենք կարող լուռ մնալ։ Նրանք ովքեր գլխագին են խոստանում PKK-ի պարագլուխների համար, համագործակցում են YPG-ի հետ։ Ամբողջ աշխարհն է տեսնում, թե ահաբեկչական կազմակերպության ղեկավարները ինչպես են վարվում այն կանանց և աղջիկների հետ, որոնց փախցրել են Քանդիլի լեռներ։ Ահաբեկիչները ոչ միայն զբաղվում է մարդ առևանգումով, այլև երեխաների առևտրով»,-ասել է Էրրդողանը։

Թուրքիայի նախագահն անդրադարձել է նաև Ռուսաստանի ու Ուկրաինայի միջև սրված հարաբերություններին։ Նա երկու երկրներին կոչ է արել հարցերը լուծել երկխոսության ճանապարհով։

Հիշեցնենք, որ Թուրքիան ահաբեկչական է համարում, թե YPG-ին, թե PKK-ին Իսկ ԱՄՆ-ն միայն PKK-ին է ահաբեկչական համարում, ինչը դժգոհություն է առաջացնում Թուրքիայում։

Աղբյուր` Diken