Իրանի խորհրդարանի քուրդ պատգամավորը Թուրքիային քննադատելու համար բերման է ենթարկվել

Տարածաշրջան07:56, 09 Դեկտեմբեր 2018

Իրանի խորհրդարանի քուրդ պատգամավորը Թուրքիային քննադատելու համար բերման է ենթարկվել

Իրանի Իսլամական Հանրապետության Ատրպատական նահանգի Մեհաբադ քաղաքից ընտրված քուրդ պատգամավոր Ջելալ Մահմուդզադեն դատապարտել է Թուրքիայի ռազմական գործողությունները Սիրիայում։

Իրանական պետական ռադիոյի հետ զրույցում պատգամավորը մասնավորապես քննադատել է Թուրքիայի զինուժի կողմից տեղի քրդական ուժերի դեմ ուղղված «Եփրատի վահան» և «Ձիթենու ճյուղ» ռազմական գործողությունները։ Նրա խոսքերով՝ Թուրքիան դրանց ընթացքում բացի քրդական ուժերից թիրախավորել է նաև խաղաղ բնակչությանը։

Քուրդ պատգամավորը քննադատել է թուրքական իշխանություններին նաև այն բանի համար, որ Թուրքիայում շարունակվում է կալանքի տակ պահվել քրդամետ «Ժողովուրդների դեմոկրատական» կուսակցության (ԺԴԿ-HDP) համանախագահ Սելահաթթին Դեմիրթաշը։

Թուրքական աղբյուրը հայտնում է, որ Ջելալ Մահմուդզադեն արդեն բերման է ենթարկվել Իրանի անվտանգության ուժերի կողմից։ Նրա գլխավորությամբ Ատրպատականի որոշ շրջաններում Թուրքիայի դեմ անգամ բողոքի ակցիաներ են տեղի ունեցել։

Աղբյուր` Yeniakit