ERMENI HABER AJANSI

Թուրքիայի ներքին գործերի նախարար Սուլեյման Սոյլուն տեղեկացրել է, որ ժանդարմերիան առաջիկա տարում 27․180 նոր զինծառայող կընդունի իր շարքերը։

Այդ կերպ փորձ կարվի ինչ-որ չափով լրացնել անձնակազմի այն կորուստը, որ գրանցվել էր 2016թ․ հուլիսի ռազմական հեղաշրջման փորձից հետո։ Նախարարը նշել է, որ 2017թ․ դրությամբ Թուրքիայի ժանդարմերիայում կար 102․763 զինծառայող, իսկ 2018թ․ այդ թիվն ավելացել էր շուրջ 22 տոկոսով՝ հասնելով 125․000-ի։

Սոյլուն նաև նշել է, որ 2018թ․ ժանդարմերիայի համար տեղական արտադրության 4 հատ T-129 ATAK ռազմական ուղղաթիռներ են գնվել, իսկ 2019թ․ ապրիլին նախատեսվում է գնել ևս 2 հատ։ Թուրքիայի ժանդարմերիայի տրամադրության տակ է կա 23 ԱԹՍ (Անօդաչու թռչող սարք), որոնցից 19-ը՝ մարտական։ 2019թ․ ընթացքում ծրագրվում է գնել ևս 30 մարտական ԱԹՍ։

2018թ․ ընթացքում գնվել է նաև 980 պարեկային, 194 զրահապատ մեքենա, որոնցից 10-ը՝ շտապօգնության։ Այդպիսով ժանդարմերիային պատկանող զրահապատ մեքենաների թիվը հասցվել է 611-ի, իսկ զրահապատ շտապօգնության մեքենաների թիվը՝ 12-ի։