Ավստրալիայի վարչապետ. «Էրդողանի արածը հանդգնություն է, նա պետք է հետ վերցնի իր խոսքերը»

Քաղաքական07:58, 20 Մարտ 2019

Ավստրալիայի վարչապետ. «Էրդողանի արածը հանդգնություն է, նա պետք է հետ վերցնի իր խոսքերը»

Ավստրալիայի վարչապետ Սքոտ Մորիսոնին զայրացրել է Նոր Զելանդիայի 2 մզկիթներում մուսուլմանների դեմ կատարված ահաբեկչության մասին Թուրքիայի նախագահ Ռեջեփ Էրդողանի հնչեցրած արտահայտությունները:

Էրդողանի խոսքերն արտաբերվել են օրեր առաջ նշված Դարդանելի (Գալիպոլի) ճակատամարտի 104-րդ տարեդարձի միջոցառումների ժամանակ: Հիշեցնենք, որ օսմանցիների հաղթած այդ ճակատամարտում անգլիական զորքերի կազմում թուրքերի դեմ կռվել են նաև ավստրալացիներ ու նոր զելանդացիներ:

Միջոցառման ժամանակ Էրդողանը, ակնարկել էր այն մասին, որ ահաբեկիչը Նոր Զելանդիայի մզկիթի վրա հարձակվելուց առաջ տարածած «մանիֆեստում» Ստամբուլը անվանել էր Կոստանդնուպոլիս:

«Դարդանելից 104 տարի հետո մեկ անգամ ևս ասում ենք, որ ձեր ուղերձը ստացել ենք: Ձեր զգացմունքներն ու մտադրություններն էլ ենք հասկացել… Ստամբուլը Կոստանդնուպոլիս չեք կարող դարձնել: Ձեր պապերը եկան, տեսան, որ այստեղ ենք, որոշները ողջ վերադարձան, որոշներն էլ՝ դագաղների մեջ: Եթե նույն նպատակով գաք, ձեզ էլ կսպասենք: Որևէ կասկած չունենաք, որ ձեզ էլ ձեր պապերի նման ենք ճանապարհելու»:

Էրդողանի այս խոսքերից հետո Մորիսոնը կանչել է Կանբերայում Թուրքիայի դեսպանին, հայտնել իր դժգոհությունը ու պարզաբանումներ պահանջել:

Ավելի ուշ Ավստրալիայի վարչապետը հայտարարություն է տարածել խնդրի վերաբերյալ, որում մասնավորապես ասված է. «Էրդողանի խոսքերն ավստրալացիների համար շատ արհամարհական են: Այսպիսի շիկացած մթնոլորտում նման արտահայտություններ անելը այլ բան չէ, քան հանդգնություն»:

Մորիսոնը նաև նշել է, որ Թուրքիայի հետ հարաբերությունները վերանայելու հարցում քննարկվելու են բոլոր տարբերակները՝ ավելացնելով, որ իրենց քաղաքացիներին զգուշացում է արվելու Թուրքիա չմեկնելու վերաբերյալ:

«Սպասում եմ այդ խոսքերի պարզաբանմանն ու հետ վերցնելուն և դա պահանջել եմ (դեսպանից-խմբ.)»,- եզրափակել է Ավստրալիայի վարչապետը:

Աղբյուր` Diken