ERMENI HABER AJANSI

ԱՄՆ-ում գտնվող Թուրքիայի պաշտպանության նախարար Հուլուսի Աքարը  թուրք լրագրողների հետ զրույցում անդրադարձել է ԱՄՆ-ի հետ լարված հարաբերություններին։ Այդ համատեքստում նա մասնավորապես խոսել է ռուսական S-400 զենիթահրթիռային ՀՕՊ համակարգերի և ամերիկյան F-35 նոր սերնդի կործանիչների մասին, որոնց պատճառով երկու երկրների հարաբերությունները խիստ լարվել են։

Ինչպես հայտնի է, Թուրքիան Ռուսաստանից գնելու է ստանա S-400 ՀՕՊ համակարգեր, սակայն այդ գործարքին դեմ է Վշինգտոնը։ Վերջինս տարբեր մակարդակներով Թուրքիային զգուշացնում է, որ եթե S-400-ները մատակարարվեն, ապա Վաշինգտոնը Թուրքիային չի մատակարարի F-35 կործանիչներ։

Ի պատասխան ԱՄՆ-ի նախազգուշացումներին՝ Աքարը հայտնել է, որ Թուրքիան չի հրաժարվելու Ռուսաստանի հետ կնքած պայմանագրարերից և S-400-ներ ձեռք բերելու որոշումը Թուրքիայի ինքնիշխանության դրսևորումն է:

Միևնույն ժամանակ Աքարը կարծիք է հայտնել, որ S-400-ների գնումը և F-35-ների նախագծում Թուրքիայի մասնակցությունը իրար հետ փոխկապակցված չեն։

Նա տեղեկություն է հայտնել, որ այն S-400-ները որոնք Թուրքիան ստանալու է Ռուսաստանից, չեն ինտեգրվելու ՆԱՏՕ-ի ընդհանուր անվտանգային համակարգին:

Միևնույն ժամանակ նա տեղեկացրել է, որ S-400-ներն ամենայն հավանականությամբ պետք է ապահովեն մայրաքաղաք Անկարայի, Ստամբուլի անվտանգությունը, իսկ F-35-ները տեղակայվելու են Մալաթիայի ավիաբազայում։

Աքարը դրանով ըստ էության ցանկացել է նկատել տալ, որ փաստացի F-35-ները և ռուսական համակարգերը գտնվելու են իրարից հեռու։

«Նրանց միջև լուրջ հեռավորություն կա։ Դրանց շուրջ կխոսենք և քննարկումներ կանցկացնենք։ Եթե այդ աշխատանքների ժամանակ տեխնիկական առումով միջոցներ ձեռնարկելու կարիք լինի, ապա դա կանենք։ Այդ հարցում մենք բաց ենք»: