Թուրքիայի իշխող կուսակցության փոխնախագահը մեկնաբանել է ԿԸՀ-ի որոշումը

Իրավական13:38, 07 Մայիս 2019

Թուրքիայի իշխող կուսակցության փոխնախագահը մեկնաբանել է ԿԸՀ-ի որոշումը

Թուրքիայի իշխող «Արդարություն և զարգացում կուսակցության» (ԱԶԿ-AKP) ընտրական հարցերով պատասխանատու, փոխնախագահ Ալի Իհսան Յավուզը մեկնաբանել է Կենտրոնական ընտրական հանձնաժովի (ԿԸՀ)` Ստամբուլի ընտրությունները չեղյալ հայտարարելու և արտահերթ ընտրություններ կազմակերպելու որոշումը:

Ալի Իհսան Յավուզը պնդել է, որ եթե ԿԸՀ-ի այս որոշումը չլիներ, ապա շատ դժվար կլիներ հետագա ընտրական գործընթացները ճիշտ և անվտանգ անցկացնել:

Նրա խոսքով` օրենքն ամբողջովին ոտնահարվել է, անտեսվել է և այդ օրենքի փոխարեն ընդդիմությունը իր օրենքն է ընդունել:

«Ոչ ոք չէր կարող սա վերահսկել, քանզի երբ մեկ անգամ արտոնություն եք տալիս, հաջորդ անգամները չեք կարող կանխել: Ուղուց շեղված բան կար: ԿԸՀ-ի որոշմամբ` այն հարթվեց: Սակայն ովքեր պատասխանատու են եղել այդ հարցում, նրանց մասով մենք մեկ առ մեկ հանցագործության վերաբերյալ հաղորդում ենք տալու»,-ասել է Յավուզը:

Հիշեցնենք, որ մարտի 31-ին Թուրքիայում կայացած ՏԻՄ ընտրություններում երկրի խոշոր քաղաքներում, այդ թվում՝ Ստամբուլում հաղթել էր ընդդիմադիր «Ժողովրդահանրապետական» կուսակցությունը (ԺՀԿ-CHP)։

Ստամբուլում պարտված իշխող «Արդարություն և զարգացում կուսակցությունը» (AKP-ԱԶԿ) քաղաքի տարբեր շրջանների արդյունքները բողոքարկելուց հետո ԿԸՀ էր ներկայացրել քաղաքապետի ընտրությունը չեղարկելու և նոր ընտրություն անցկացվելու պահանջով դիմումը: Դրանից օրեր անց ԿԸՀ-ը որոշում կայացրեց չեղարկել ընտրությունները՝ չեղյալ հայտարարելով 16.000 ձայնի առավելությամբ քաղաքապետ ընտրված ընդդիմադիր ԺՀԿ-ի թեկնածու Էքրեմ Իմամօղլուի մանդատը:

Թուրքիայի խոշորագույն քաղաքի քաղաքապետի նոր ընտրությունների օր է նաշանակվել հունիսի 23-ը:

Աղբյուր` Sabah