Իրաքն ու Թուրքիան պատրաստվում են խորացնել երկկողմ հարաբերությունները

Տարածաշրջան11:17, 16 Մայիս 2019

Իրաքն ու Թուրքիան պատրաստվում են խորացնել երկկողմ հարաբերությունները

Անկարայում հանդիպել են Թուրքիայի նախագահ Ռեջեփ Թայիփ Էրդողանը և Իրաքի վարչապետ Ադել Աբդելմեհդին:

Հանդիպումից հետո կողմերը մամուլի ասուլիս են տվել, որի ընթացքում խոսել են հանդիպման մանրամասներից։ Էրդողանի խոսքերով ձեռք է բերվել պայմանավորվածություն ռազմական և անվտանգության ոլորտում պայմանագիր ստորագրելու վերաբերյալ։

Պայմանավորվածություն է ձեռք բերվել նաև վճռականորեն պայքարել Թուրքիայի կողմից ահաբեկչական համարվող «Քուրդիստանի բանվորական կուսակցության» (ՔԲԿ-PKK), գյուլենական համայնքի և «Իսլամական պետություն» (ԻՊ) ահաբեկչական կազմակերպության դեմ։

Կողմերը կարևորություն են տվել Քիրքուք-Ջեյհան նավթամուղի վերականգման աշխատանքներին: Նավթամուղը վնասվել էր ԻՊ-ի ահաբեկիչների հարձակման հետևանքով։

Էրդողանը պնդել է, որ Իրաքն ու Թուրքիան նպատակ ունեն մեծացնել առևտրաշրջանառության ծավալները, այս պահին այն կազմում է 20 մլրդ դոլար։

Նշվել է, որ այդ հարցը քննարկվելու է ընթացիկ տարում Իրաք կատարելիք Էրդողանի այցի ժամանակ։