ERMENI HABER AJANSI

Թուրքական հասարակության շրջանում նվազում է աջակցությունը կառավարման նախագահական համակարգին:

Թուրքական «Metropoll» սոցիոլոգիական կազմակերպության կողմից հունիսի 15-16-ին Ստամբուլում իրականացված հարցումների արդյունքում պարզ է դարձել, որ այս պահին հասարակության ավելի մեծ հատվածը կնախընտրեր երկրում լիներ խորհրդարանական կառավարման համակարգ:

«Եթե նախագահական համակարգին անցնելու հանրաքվեն այսօր լիներ, ինչպե՞ս կքվեարկեիք» հարցին պատասխանած մասնակիցների 58.6%-ը նշել է, որ կողմ է խորհրդարանական համակարգին: Իսկ Նախագահական համակարգին կողմ է արտահայտվել 39.4%-ը: 2%-ը դժվարացել է պատասխանել:

2017 թվականի ապրիլի 16-ին երկրում տեղի ունեցած հանրաքվեի ժամանակ խորհրդարանական համակարգը պաշտպանել էր մասնակիցների միայն 48.59%-ը, 51.41-ը կողմ էր արտահայտվել նախագահական համակարգին:

Նախագահ Ռեջեփ Թայիփ Էրդողանի գլխավորած իշխող «Արդարություն և զարգացում» կուսակցության (AKP-ԱԶԿ) ընտրողների 13%-ը համարել է, որ նախագահական համակարգին անցում կատարելը օգտակար չի եղել: Նույն կարծիքին են եղել «Ազգայնական շարժում» կուսակցության (MHP-ԱՇԿ) ընտրողների 41%-ը:  

Հարցման մասնակիցների 11.6%-ը նախագահական համակարգը շատ օգտակար է համարել, օգտակար է համարել 29.2%-ը, օգտակար չի համարել 23.1%-ը, ընդհանրապես օգտակար չի համարել 27.6%-ը:

Նշենք, որ այս հարցումն իրականացրած «Metropoll» կազմակերպությունը Ստամբուլի քաղաքապետի ընտրություններից առաջ ևս սոցհարցում էր իրականացրել: Ի տարբերություն մի շարք սոցիոլոգիական կազմակերպությունների անցկացրած հարցումների՝ «Metropoll»-ի արդյունքները ամենամոտն են եղել ընտրությունների իրական արդյունքներին:

Ըստ «Metropoll»-ի՝ ընդդիմության թեկնածու, Ստամբուլի քաղաքապետ ընտրված Էքրեմ Իմամօղլուն ստացել է ձայների 54.5%-ը, իսկ իշխանության թեկնածու Բինալի Յըլդըրըմը՝ ձայների 43.9%-ը: 

Ընտրություններում գրանցված իրական արդյունքները հետևյալն էին՝ Իմամօղլու-54.21%, Յըլդըրըմ-44.99%: