Տուսկի պատասխանը Էրդողանին. «Մեզ համար անընդունելի է, որ փախստականների գործոնը որպես շանտաժ օգտագործեն»

Քաղաքական17:36, 11 Հոկտեմբեր 2019

Տուսկի պատասխանը Էրդողանին. «Մեզ համար անընդունելի է, որ փախստականների գործոնը որպես շանտաժ օգտագործեն»

Եվրախորհրդի նախագահ Դոնալդ Տուսկը Թուրքիայի կողմից Սիրիայի հյուսիս-արևելքում իրականացվող «Խաղաղության ակունք» ռազմական գործողության վերաբերյալ Twitter-ում գրառում է արել։

Անդրադառնալով նախօրեին Թուրքիայի նախագահ Ռեջեփ Թայիփ Էրդողանի հնչեցրած սպառնալիքներինին՝ նա մասնավորապես նշել է.

«Մեզ համար անընդունելի է, որ փախստականների գործոնը զենքի վերածեն և մեզ շանտաժ անելու համար օգտագործեն: Էրդողանի երեկվա հայտարությունն անտեղի էր»:

Միջանկյալ նշենք, որ Էրդողանը ԵՄ երկրների կողմից կատարված համատեղ հայտարարությանը ի պատասխան ասել էր, որ «կբացեն դարպասները» և Թուրքիայում ապաստանած 3.6 մլն սիրիացի փախստականներին կուղարկեն Եվրոպա:

«Թուրքիան պետք է հասկանա, որ մեր հիմնական մտահոգությունն այն է, որ սա կարող է հանգեցնել մեկ այլ մարդկային ողբերգության»,- նշված է գրառման մեջ:

Հիշեցնենք, որ Եվրամիության 28 երկրները համատեղ հայտարարությամբ Թուրքիայից պահանջել էին դադարեցնել Սիրիայի հյուսիս-արևելքում սկսած ռազմագործողությունը և ընդգծել, որ Սիրիայի հարցը չի կարող լուծվել ռազմական ճանապարհով:

Աղբյուր` T24.com.tr