ERMENI HABER AJANSI

Թուրքիայի նախկին վարչապետ Ահմեթ Դավութօղլուի հիմնած «Ապագա» (“Gelecek Partisi”) կուսակցության նորամուտով Թուրքիայի քաղաքական կուսակցությունների թիվը հասավ 79-ի։

Դրանցից 30-ը հիմնվել են վերջին 5 տարվա ընթացքում։ Թուրքիայի Վճռաբեկ դատարանի կողմից հրապարակված զեկույցի համաձայն՝ ամենից շատ անդամներ ունի  իշխող «Արդարություն և զարգացում» կուսակցությունը (ԱԶԿ-AKP), որին անդամակցում է 9 մլն 816․987 քաղաքացի։

Երկրորդ տեղում ընդդիմադիր «Ժողովրդահանրապետական» կուսակցությունն (ԺՀԿ-CHP) է, որն ունի 1 մլն 253․604 անդամ։ Իսկ «Ազգայնական շարժում» կուսակցության  (MHP) անդամների թիվը կազմում է 469․637։

«Դեմոկրատական» կուսակությունն (Demokrat Parti) ունի 448․298, «Երջանկություն» կուսակցությունը (Sadakat Parti)՝  222․151, 2017-ին հիմնված «Լավ» կուսակցությունը (İyi Parti)՝ 209․229,  իսկ քրդամետ «Ժողովուրդների դեմոկրատական» կուսակցությունը (HDP)՝ 38․864 անդամ։

Ուշագրավ է, որ երկրում գրանցված 79 կուսակցությունից 13-ը ընդհանրապես որևէ գրանցված անդամ չունի։ Իսկ որոշները, ինչպես օրինակ՝ «Ժողովրդավար երիտասարդ» կուսակցությունն (Demokratik Genç Parti) ու «Առանց խոչընդոտների Թուրքիա» կուսակցությունը (Engelsiz Türkiye Partisi) չունեն նույնիսկ ղեկավար։